BAUCAU, 01 novembru 2021 (TATOLI) – Dom Basílio do Nascimento husik ona sarani sira kapitál Dili no oras ne’e sarani Dioseze Baucau preparadu simu mate-isin.
Ho situasaun ne’e, Komandu Pólisia Nasionál Timor-Leste (PNTL) alerta-ida hodi asegura seguransa no movimentu sarani sira durante prosesu omenajen ikus to’o fúnebre Bispu Dioseze Baucau, Dom Basílio do Nascimento.
Komandante PNTL Munisípiu Baucau, Superintendente Xefe Armando Monteiro, hateten, hafoin enkontru ikus hamutuk ho komisaun hosi Dioceze nian hahú kedas hala’o preparasaun ne’ebé daudaun ne’e atinje ona 90%.
“Ita alerta ida tanba situasaun, nu’udar uma-na’in ita tenke prontu no preparadu atu fó seguransa másimu,” Komandante PNTL Baucau, ko’alia Villa Antiga, segunda ne’e.
Iha nível tátika Servisu Komandu Konjunta Operasaun Koordenada (SKKOK) nu’udar Komandante Operasaun PNTL serbisu hamutuk ho FALINTIL-FDTL Komponente Terrestre prepara mós simu kadáver Dom Basílio hosi katedrál hafoin entrega ba Padre sira.
Parte seguransa koordena mós ho guarda Igreja atu hamutuk kontrola movimentu sarani nian no movimentu transporte nune’e labele mosu engarafamentu durante prosesu hahú hosi loron 01 to’o loron 4 fulan-novembru 2021.
“Inísia kedas planu operasaun SKKOK preparadu ona nune’e ita garante seguransa ba sarani no komunidade Baucau durante hala’o eventu rua hanesan seguransa ba prosesu fúnebre nomoos selebrasaun finadu,” Monteiro argumenta.
Monteiro husu kolaborasaun no kontribuisaun hosi sarani Baucau ne’ebé selebra loron finadu ho tristeza tanba atu apoia malu iha serbisu nune’e labele hamosu engrafamentu no problema seluk.
PNTL Munisípiu Baucau sei asegura mós fatin deskansa ba sarani hosi Parókia Lautém, Manatuto no Viqueque ne’ebé prezensa atu fó omenajen inklui partisipa serimónia funerál.
Fatin sira-ne’ebé sai konsentrasaun mak hanesan kampu alegria, eskola Sekundaria Santo António (ESSA), Teulale Baucau no Eskola Scrodes Villa Nova. PNTL Munisípiu Baucau hahú hosi komandu to’o eskuadra mantein oras 24 durante serimónia simu to’o funerál ne’ebé sei finaliza iha loron 4 novembru.
Hosi observasaun Agéncia TATOLI iha terrenu nota, sarani, padre no madre sira, seguransa PNTL, FALINTIL-FDTL, nafatin prepara-aan atu simu Bispu Dioseze Baucau Dom Basílio do Nascimento ne’ebé tuir oráriu sei to’o iha Igreja Katedrál Baucau, oras 14:00.
Notísia relevante: Estadu kondekora Dom Basílio do Nascimento ho Colar Ordem Timor-Leste
Jornalista : Natalino Belo
Editór : Evaristo Soares Martins
