DILI, 16 novembru 2021 (TATOLI)– Ekipa futeból FIEL FC “derrota” kontra nia adversáriu Portu Taibesi FC ho eskore 1-3, iha jogu jornada ikus iha grupu A, segunda divizaun Liga Futeból Timor-Leste (LFTL) ne’ebé hala’o iha estádiu munisipál Dili, tersa loraik ne’e.
Hosi vitória ne’e la fó rezultadu di’ak ba Porto tanba tenke manán FIEL skore 5-0, hafoin hases Academica FC hosi pozisaun primeiru tabela klasifikasaun.
Ekipa Portu Taibesi mós ho pontu 10, hanesan ho Academica FC, maibé Porto nia golu menus. Nune’e Academica mak sei kontra Emmanuel iha finál Liga Futeból Timor-Leste (LFTL) ne’ebé hala’o iha 7 dezembru iha estádiu munisipál Dili.
Maski nune’e, iha liga époka ne’e ekipa haat hosi segunda divizaun konfirmadu ona ultrapasa ba primeira divizaun hanesan Academica FC, Atletico Ultramar, Porto Taibessi FC no Emmanuel FC.
Jogu ne’ebé fó vitoria ba Porto, tanba iha minutu sia, jogadór João Pereira (21), hatama golu da-uluk hodi eskore sai 1-0. Maski nune’e FIEL la nonok de’it ho golu ne’e kontinua esforsu no hamate tutuir jogu Porto nian.
Esforsu hirak ne’ebé FIEL halo la hela de’it hanesan esforsu tanba iha minutu 42 jogadór João Ximenes (17) responde ona golu ida hodi muda rezultadu ba empate 1-1.
Golu ne’e hanesan golu ikus iha minutu primeira parte no to’o jogu termina laiha tan golu ruma mak akontese ba ekipa rua.
Hakur ba dsegunda parte ekipa rua nafatin hatudu jogu ho ritmu ne’ebé as atu buka hatama golu hodi fó vitória ba nia ekipa.
Ho forsa ne’ebé Porto iha fó duni rezultadu ne’ebé di’ak tanba iha minutu 72, jogadór Nelvio Almeida (11) lansa tan golu ida muda rezultadu ba 2-1.
Jogu sei la’o nafatin maibé Porto hahú domina bola atu realiza sira nia ambisaun ne’ebé tenke manán ho golu barak, maibé mehi hirak ne’e hela de’it hanesan mehi tanba jogu atu termina iha 90+1, jogadór Nelvio Almeida halo golu ida rezultadu metin ho 3-1.
Notísia Relevante: Emmanuel troka Ultramar lidera grupu B ho pontu 12
Jornalista : Hortencio Sanchez
Editór : Florencio Miranda Ximenes
