DILI, 19 novembru 2021 (TATOLI)—Empreza Traktorindo Unipesoal, Lda entrega ekipamentu lima, kompostu hosi mákina pezadu tolu, ambulánsia ida no karreta marka Triton ida, ba Institutu Jestaun Ekipamentu, Institutu Públiku (IGE, I.P, sigla portugés), iha sesta ne’e, hafoin halo manutensaun.
“Mákina sira ne’ebé ohin simu hanesan doasaun hosi Governu Japaun, ne’ebé ita halo serbisu durante tinan-20 ona, maibé kondisaun mákina a’at no presiza halo manutensaun,” Prezidente Konsellu Administrasaun IGE, I.P, Ermenegilda da Costa Laurentina, hateten, hafoin simu ekipamentu hosi empreza iha Caicoli.
Notísia relevante: IGE, I.P simu pedidu hamutuk 411 loke estrada iha área rurál
Totál ekipamentu ne’ebé institutu entrega ba Traktorindo halo manutensaun hamutuk unidade 23, maibé foin entrega lima, enkuantu 18 seluk iha hela prosesu manutensaun.
“Ekipamentu seluk ne’ebé seidauk halo manutensaun tanba situasaun COVID-19 mak atraza pesa ne’ebé foti hosi país seluk no atraza iha Portu Dili, maibé iha kompromisu katak sira sei finaliza no entrega,” nia akresenta.
Totál orsamentu ba manutensaun mákina unidade 23 hamutuk $252.000 no ekipamentu lima ne’ebé ohin entrega uluk ne’e ho kustu $25.000.
Iha sorin seluk, Prezidente IGE, I,P rejeita informasaun ne’ebé fó sai katak institutu la preparadu atu haree ba estragu ne’ebé akontese bainhira mosu dezastre naturál kauza hosi La Niña, tanba iha ona esperiénsia atende estragu ne’ebé akontese iha inundasaun loron 04 abríl liubá.
Notísia relevante: IGE halo ona intervesaun normaliza fatin 19 iha Dili
Nune’e, IGE, I.P sei serbisu hamutuk ho komunidade iha terrenu hodi haree ba situasaun emerjénsia sira hotu.
“Ami kontente tanba mákina tolu ne’ebé ohin simu ne’e bele apoiu tan IGE nia servisu ba futuru, tanba ita hatene katak iha ona informasaun hosi meteorolojia katak sei iha La Niña ne’ebé tuir mai, entaun ami preparadu ho mákina, operadór mekániku no funsionáriu sira atu hasoru situasaun sira hotu,” nia Ermenegilda da Costa.
Aleinde ne’e, ekipamentu ne’ebé ohin empreza entrega, la’ós de’it iha Dili maibé ba munisípiu hotu ne’ebé hetan impaktu dezastre naturál.
“Parte IGE, I.P haree ida ne’ebé mak emerjénsia liu, entaun mobiliza uluk ba fatin emerjénsia ne’e,” nia tenik.
Iha fatin hanesan, Diretór empreza Traktorindo, Didit Margono, agradese ba Governu tanba fó fiar halo manutensaun ba ekipamentu pezadu.
“Mákina seluk ami hadi’a hela, tanba bainhira ami manán konkursu halo manutensaun ekipamentu pezadu sira ne’e iha situasaun COVID-19 nia-laran, entaun mákina nia pesa sira ami tenke haruka hosi nasaun hanesan Indonésia, Japaun no Singapura. Ida-ne’e mak halo atraza, maibé ami iha kompromisu sei halo hotu serbisu sira ne’e,” Didit Margono komprometidu.
Jornalista : Arminda Fonseca
Editora : Julia Chatarina
