DILI, 20 novembru 2021 (TATOLI) – Ministériu Finansa (MF) Realiza ona pagamentu insentivu finanseiru estraordináriu ba suku sira iha munisípiu ualu (8).
“Ministériu Finansa liuhusi Sekretariadu Tékniku Fundu Covid-19, realiza ona pagamentu insentivu finanseiru estraordináriu suku ba munisípiu ualu mak hanesan Aileu, Ainaro, Baucau, Covalima, Ermera, Lautem, Liquiçá no Manatuto,” relata nota imprensa ne’ebé Agência Tatoli, sábadu.
Nune’e, totál benefisiáriu hamutuk 5.507 ba períodu fulan-lima hahú husi fulan-jullu to’o fulan-novembru 2021 ho montante millaun $1,4.
Pagamentu ne’e ne’e hala’o hafoin Ministériu Administrasaun Estatál (MAE) submete pedidu pagamentu ba Ministériu Finansa ho totál benefisiáriu 8.959 ho valór millaun $2,7.
Entretantu, pagamentu insentivu finanseiru estraordináriu suku ba munisípiu Díli, Manufahi, Viqueque, Bobonaro no RAEOA seidauk bele realiza tanba Ministériu Finansa sei hein MAE submete relatóriu Oustanding adiantamentu tinan 2020.
To’o iha 17 novembru 2021, MF ezekuta ona pagamentu suplementu remuneratóriu liña-frente ho valór millaun $15,1 (29%) husi orsamentu alokadu ba liña-frente hamutuk millaun $51,9. Enkuantu taxa ezekusaun reál fundu COVID-19 to’o 17 novembru atinje ona millaun $127,9 (44%) husi orsamentu alokadu millaun $287,6.
Instituisaun sira-ne’ebé Governu halo ona pagamentu suplementu remuneratóriu komposta hosi Polísia Migrasaun, FALINTIL-Forsa Defeza Timor-Leste (F-FDTL), Polísia Nasionál Timor-Leste (PNTL), Sala Situasaun Sentru Integradu Jestaun Krize (CIGC, sigla portugés).
Pagamentu hirak-ne’e hala’o tanba Prezidente Repúblika, Francisco Guterres Lú Olo, promulga ona alterasaun daruak ba Dekretu-Lei Suplementu Remunetrátoriu ba liña frente ne’ebé halo atividade profisionál iha situasaun pandemia COVID-19, ne’ebé pagamentu hahú iha marsu to’o dezembru 2021 bainhira orsamentu Jerál Estadu (OJE) 2021 ramata.
Dekretu-Lei kona-ba Suplementu Remuneratóriu define profisionál elejível hetan direitu mak médiku, enfermeiru, auxiliár ba asaun médika, parteiru sira, téniku análiza laboratóriu, tékniku saúde públika, tékniku radiolojia, sira-ne’ebé ezerse funsaun iha Sala Situasaun, Sentru Integradu Jestaun Krize (CIGC, sigla portugés), motorista veíkulu, responsável sira-ne’ebé lori ema ba izolamentu obrigatóriu, elementu PNTL no F-FDTL ne’ebé envolve iha prevensaun no kontrolu COVID-19, traballadór sira iha Autoridade de Inspesaun no Fiskalizasaun Atividade Ekonómika, Sanitária no Alimentár (AIFAESA), Diresaun Nasionál Kuarentena no Bioseguransa, Servisu Migrasaun no Autoridade Aduaneira, Servisu Nasionál Intelijénsia.
Nune’e mós Diresaun Nasionál Seguransa Patrimóniu Públiku, no servisu autoridade ka administrasaun munisipál, responsável ba halibur, lori no soe lixu, sira-ne’ebé hola parte servisu autoridade ka administrasaun munisipál, servisu munisipál ba fornesimentu bee-moos, koveiru sira no sira-ne’ebé integra iha ekipa ne’ebé hala’o servisu iha Rejiaun Adminstrativa Espesial Oé-cusse Ambeno (RAEOA).
Notísia relevante: MF realiza pagamentu suplementu remuneratóriu ba membru F-FDTL hamutuk 2.100
Jornalista : Antónia Gusmão
Editór : Evaristo Soares Martins
