BOBONARO, 23 novembru 2021 (TATOLI)–Progresu kontrusaun Uma Kbiit Laek (UKL) liuhosi Planu Nasionál Dezenvolvimentu Suku (PNDS) iha munisípiu Bobonaro atinje ona 50% hosi totál unidade 150.
Diretór PNDS Munisípiu Bobonaro, Paulino Viegas Tilman, informa progresu fíziku konstrusaun UKL iha munisípiu ne’e atinje ona 50,18% hosi totál unidade 150.
“Ita haree dadus nível postu administrativu Lolotoe mak progresu sa’e maka’as liu, tuir kedas Atabae, maizumenus seluk mós totál pursentu ne’e 40 ba leten ona, kuandu ita akumula ba nível munisípiu mak atinje ona 50,18%,” nia ko’alia iha Maliana, segunda ne’e.
Governu Sentrál aloka Orsamentu Jerál Eestadu (OJE) 2021 ho orsamentu $2.443,665.07 ba PNDS munisípiu Bobonaro hodi konstrui Uma Kbiit Laek hamutuk unidade 150 iha suku 50 ne’ebé perkore postu administrativu neen.
Implementasaun no progresu UKL ne’e iha fulan-novembru iha postu administrativu Bobonaro 44%, Atabae 58%, Balibo 37%, Cailaco 46% Loloto’e 66% no postu administrativu Maliana 49%.
Nia dehan, dezde implementasaun projetu to’o oras ne’e hasoru difikuldade mak situasaun Covid-19 no mudansa klimátika, difikulta kompañia fornesedór sira distribui materiál fabrikadu ba to’o benefisiáriu sira-nia fatin, tanba balu hela liu iha mota-ninin.
Maibe tuir diretór ne’e, difikuldade ne’e la sai obstakúlu ba ekipa PNDS atu aselera projetu ne’e hodi kumpre data ne’ebé termina ona katak sei entrega iha dezembru tinan ne’e.
Jornalista : Sérgio da Cruz
Editor : Evaristo Soares Martins
