EKONOMIA, HEADLINE, LIQUIÇÁ, MUNISÍPIU

AIFAESA halo destruisaun ba produtu ai-han liu prazu

AIFAESA halo destruisaun ba produtu ai-han liu prazu

Ekipa AIFAESA hahú hatun produtu ai-han hosi karreta hodi halo destuisaun iha sentru lixeiru Tibar, kinta (25/11). Imajen TATOLI/Anito Soares

LIQUIÇÁ, 25 novembru 2021 (TATOLI)–Autoridade Atividade Ekonómia Sanitária no Alimentár, Institutu Públiku (AIFAESA, I.P) liuhosi Diresaun  Divizasaun Operasaun, iha kinta ne’e, halo destruisaun ba produtu ai-han na’an-manu tasak liu prazu.

Xefe Departamentu Divizasaun Operasaun AIFAESA, Viriato Paulo, hateten, ai-han sira ne’ebé halo distruisaun hosi empreza Fast Food Timor, Lda, ne’ebé ekipa halo inspesaun deteta iha loron 30 setembru, maibé produtu ne’e ninia validade to’o 30 jullu 2021.

“Produtu ne’ebé ohin halo destruisaun mak krispy fried chicken ho ninia kuantidade kaixa 14 no plástiku neen, momentu ne’e ita halo auto notísia ba empreza, ne’ebé antes ne’e sira rasik hatama pedidu halo destruisaun ba sasán ne’ebé liu prazu,” Xefe Departamentu informa hafoin halo destruisaun produtu, iha sentru lixeiru Tibar.

Notísia relevante: AIFAESA Halo Destruisaun ba Sigaru Masu 6.240 no Produtu Liu Prazu Hamutuk 7.823

Maski empreza rasik koopera ona ho autoridade no halo pedidu destruisaun ba produtu liu prazu, maibé prosesu kontra ordenasaun kontinua la’o.

“Ita-nia dekretu-lei númeru 23/2009, artigu 13 kona-ba multa katak estabelesimentu ekonómika ne’ebe komete infrasaun hanesan fa’an produtu liu pazu, produtu estragadu, laiha lisensa no lisensa mate, sei hetan sansaun multa kiik liu $1.000 to’o $5.000,” nia akresenta.

Kona-ba inspesaun ba loja sira seluk iha Dili laran, AIFAESA kontinua halo kontrolu kada loron dala-rua, iha dadeer no lorokraik.

“To’o agora ita seidauk identifika ita-nia emprezáriu sira fa’an sasan liu prazu,” nia tenik.

Jornalista : Arminda Fonseca

Editora     : Julia Chatarina

iklan
iklan

Leave a Reply

iklan
error: Content is protected !!