BAUCAU, 01 dezembru 2021 (TATOLI) – Servisu Munisipál Saúde Baucau tuir alvu iha fulan-dezembru presiza tán stock vasina AstraZeneca hamutuk vial 200 hodi finaliza totál komunidade 12.968.
Diretór Servisu Saúde Munisípiu Baukau, Domingos Reinaldo da Costa Guterres, esplika, sidadaun ne’ebé simu ona vasina doze dahuluk hamutuk 60,349 korresponde 82% no doze kompletu hamutuk 42,333 korresponde ho 57%, komunidade ne’ebé seidauk vasina hamutuk 12.968 hosi totál alvu 73.317.
“Nia stock ema ida tenke simu doze daruak ne’ebé kuaze 200 vial hanesan ne’e bele ona,” Diretór Saúde Munisípiu Baucau ko’alia iha Sentru Saúde Riamare, Baucau, kuarta ne’e.
Stock vasina AstraZeneca rasik dadaun-ne’e laiha nune’e loron ohin laiha kampaña vasinasaun no tuir planu hahu fali kinta (02/12) tanba sei hein transporta hosi nasionál.
Domingos akresenta, vasina AstraZeneca durasaun tempu la naruk atu rai kleur iha armazein, nune’e iha vasina balun expire iha fulan-novembru hamutuk vial tolu ne’ebé tuir loloos utiliza ba ema na’in-30.
Nia husu komunidade atu iha konsiénsia hola-parte iha kampaña vasinasaun hodi aselera programa imunizasaun refere iha fulan-dezembru laran nune’e vial 200 tuir mai labele hetan estragu ka expire.
“Ekipa sira hahú tún ona ba nasionál hodi lori fali vasinasaun foun hodi kontinua vasina ba sidadaun sira,” Domingos akresenta.
Nia fó-sai katak, oras ne’e saúde kontinua fó vasinasaun ba komunidade sira no sidadaun balun hetan ona vasina to’o doze datoluk tanba konsiénsia rasik.
“Komunidade ne’ebé durante ne’e ta’uk, família sira konvense no iha ona konsiénsia mai vasina, ne’ebé loron-loron ita simu ida-ne’ebé doze dahuluk, no doze daruak ita kontinua fó no balun hetan tia ona doze datoluk,” Domigos akresenta.
Domingos akresenta, bele fó prioridade ba idozu sira simu doze datoluk maibé depende ba konsiénsia.
Entretantu, Responsável programa imunizasaun, Servisu Munisípal Saúde Baucau, Artemizia Arseres Ximenes Guterres, fó-sai katak, sidadaun na’in-25 simu vasina datoluk tanba hetan rekomendasaun no sofre moras kankru no kumplikadu inklui pesóal saúde balun ne’ebé oferese-aan voluntáriu.
“Sira hakarak simu vasina to’o doze datoluk tanba hakarak prevene-aan hosi Covid-19, tanba vasina AstraZeneca bele kura moras no bele fó imunidade atu prevene moras sira seluk, ne’e mak kolega balun no mós komunidade sira-ne’ebé hakarak, bele simu,” Artimizia informa.
Jornalista : Natalino Belo
Editór : Evaristo Soares Martins
