EKONOMIA, HEADLINE, KAPITÁL, LIQUIÇÁ, MUNISÍPIU

Suku Lisadila 75% asesu infraestrutura bázika

Suku Lisadila 75% asesu infraestrutura bázika

Xefi Suku Lisadila, Fernando Lobo. Imajen Tatoli/Jogerjo Guterres.

LIQUIÇA, 03 dezembru 2021 (TATOLI) – Suku Lisadila ne’ebé lokaliza iha postu administrativa Maubara, munisípiu Liquiça, maioria asesu ona infraestrutura bázika, hanesan bee-moos, fasilidade saúde, enerjia eletrisidade no estrada.

“Infraestrutura bázika ha suku Lisadila hanesan, bee-moos ami maioria ka ha’u bele dehan 75% asesu hotu ona”, Xefe suku Lisadila, Fernando Lobo, informa ba Agéncia Tatoli iha suku Lisadila, Maubara, sesta ne’e.

Kona-ba asesu ba edukasaun no sentru saúde mós di’ak tanba iha suku ne’e iha pre-eskolár rua, ensinu báziku segundu síklu rua, ensinu báziku terseiru síklu no ensinu téniku vokasionál iha ida. 

Komunidade sira iha suku Lisadila, postu administrativu Maubara, munisípiu Liquiçá. Imajen mídia MAPKOMS.

“Kona-ba Saúde mós la’o di’ak, tanba iha suku ne’e iha postu saúde rua kompletu kedas ho profisionál saúde, durante ne’e la’o di’ak,” nia salienta.

Autoridade lokál ne’e fó sasin, fasilidade saúde liuliu ambulánsia antes seidauk akontese surtu COVID-19 ambulánsia susar maibé ho prevensaun no mitigasaun COVID-19 ne’e ambulánsia loron-loron ba-mai de’it.

Enerjia eletrisidade mós durante ne’e maioria populasaun asesu, hirak-ne’ebé hela iha área rurál liu maka seidauk asesu maibé númeru ne’e natoon de’it.

Kondisaun estrada difikulta

Sorin seluk, autoridade lokál ne’e preokupa ho kondisaun estrada estrada parte Loes nian to’o iha sira-nia suku tanba estrada kondisaun ladún di’ak no iha mota barak nune’e tempu udan sira labele asesu, ho nune’e produtu lokál sira rai to’o dodok.

“Kona-ba estrada mak difikulta ami, atu transporte asesu no komunidade tanba atu lori produtu lokál ba merkadu ladi’ak tanba kondisaun estrada ladi’ak, maibé iha tinan 2021 ne’e suku Lisadila hela mós projetu estrada rurál rua ho kilómetru sia-resin distánsia suku Uatubo to’o Lisadila, no estrada liga suku Maubara Lisa to’o Lisadila ho kolómetru tolu,” nia haktuir.

Tuir nia, suku Lisadila iha rai ida potensiál tebes tanba komunidade maioria ninia moris agrikultura, ne’ebé kada semana produtu lokál sira-ne’ebé lori ba merkadu nasionál ne’e produtu lokál sira-ne’e hosi Lisadila.

Enkuantu, kona-ba bee-moos 75% komunidade asesu bee-moos, tanba iha Organizaun Naun Governamantál no PNDS dada bee-moos, ne’ebé laiha difikuldade ba bee-moos.

Suku Lisadila iha aldeia hitu (7), hanesan Bautalo, Kaikasa, Darulema, Glai, Lebuae, Manucabi, no aldeia Nunulisa, ho totál populasaun 3.800.

Notisia relevante: SEKoop husu komunidade Lisadila harii kooperativa produsaun

Jornalista         : Antónia Gusmão

Editór               : Evaristo Soares Martins 

iklan
iklan

Leave a Reply

iklan
error: Content is protected !!