iklan

DILI, HEADLINE, POLÍTIKA

PN aprova millaun $20 kapitaliza BNCTL

PN aprova millaun $20 kapitaliza BNCTL

Deputadu sira iha Parlamentu Nasionál aprova orsamentu iha debate no votasaun OJE 2022 iha sala plenária Parlamentu Naasionáll, kinta (9/12/2021). Imajen TATOLI/Antonio Gonçalves.

DILI, 09 dezembru 2021 (TATOLI)—Parlamentu Nasionál aprova orsamentu ho totál millaun $20 ba tinan fiskál 2022 hodi kapitaliza Banku Nasionál Komérsiu Timor-Leste (BNCTL).

“Reforsa ita-nia banku anualmente BNCTL bele iha kapasidade atu halo servisu atendimentu ba  ita-nia emar sira hodi asesu, nune’e dezenvolvimentu ekonómiku gradualmente banku ida-ne’e fó kontribuisaun,” Deputadu proponente, Antoninho Bianco, hateten iha debate proposta lei Orsamentu Jerál (OJE) 2022 iha espesialidade iha plenária PN, kinta ne’e.

Hanesan proponente iha komisaun D rona hanesan iha planu estratéjiku iha BNCTL prevee ba kapitalizasaun to’o millaun $150 maibé tanba iha ona hosi esforsu hosi Governu agora inísiu tau ona millaun $40 iha orsamentu, maibé balun iha fazeadamente sei bele tanba fazeadamente ita mak sei tau nafatin tanba planu estratéjiku BNCTL nian.

Proponente sira hanoin katak mezmu Governu tau ona iha ne’e millaun $40 nune’e hosi proposta aumenta tan millaun $20.

“Nune’e, dentru planu estratéjiku BNCTL rasik proximamente Governu tetu tan atu hala’o dezenvolvimentu kapasidade banku ne’e, konsidera depende ba Governu simu ka lae,” nia dehan.

Reprezentante povu iha uma fukun, kinta ne’e iha debate espesialidade ba proposta OJE 2022, aprova proposta númeru 44 ho totál montante millaun $20 ba kapitalizasaun BNCTL. Ho rezultadu votasaun a-favór 54, kontra lima (5) no abstensaun neen (6).

Títulu servisu Dotasaun Todo Governu, kategória despeza transferénsia no programa ho kódiku 983 kona-ba investimentu no diversifikasaun ekonómika dotasaun inisiál millaun $40 ho aumenta adisionál millaun $20, nune’e dotasaun finál kategória sa’e ba millaun $60.

Proposta ne’e aprezenta hosi Antoninho Bianco ho Olinda Guterres. Justifikasaun sumáriu hosi proponente sira katak, aumenta fundu provizaun atu kapitaliza Banku Nasionál Komérsiu Timo-Leste (BNCTL)

Iha mós proposta númeru 43 hosi proponente António Nobre Tilman, Ricardo Baptista ho Mariano Assanami sabino husu aumenta millaun $60 hodi kapitaliza BNCTL ho justifikasaun sumária proponente aumenta provizaun ba kapitalizasaun BNCTL atu fó apoiu empreza  ba planu rekuperasaun ekonómia maibé proposta ne’e la passa

António Nobre Tilman, hateten ko’alia kona-ba rekuperasaun ekonómika tenke halo mós investimentu ba banku atu nune’e bele fasilita kreditu ba empreza kiik, agrikultór, peskadór hodi finansia atividade.

Maibé proposta ne’e la pasa ho rezultadu votasaun a-favór 22, kontra 31 no abstensaun 12.

Ministru Koordenadór Asuntu Ekonómiku (MKAE), Joaquim Amaral, hateten Governu mai ho proposta orsamentu ne’ebé hanoin atu kapitaliza fazeadamente tanba ne’e orsamentu Governu aloka ona no iha proposta tama mai haree katak iha intensaun di’ak reforsa BNCTL.

“Tanba ne’e ita tetu prinsípiu fazeamente atu nune’e banku bele ezerse nia funsaun no planu kapitalizasaun ne’e rasik kumpre tuir planu periódu ne’ebé aprezenta. Tanba ne’e, hanoin Governu sei husu ba Ministru Finansa kona-ba tetu atu hatán kapitalizaun tanba Governu mai ho programa tau ona,” nia hateten.

Ministru Finansa, Rui Augusto Gomes, iha proposta rua ne’e haree reforsu kapitál hamutuk millaun $80 ba asuntu ne’e pertinente Ministéiru Finansa hosi perspestiva finansa husu deputadu sira atu tetu antes molok tama iha desizaun.

MF iha kuñesimentu durante audénsia ho komisaun espesializada BNCTL invoka razaun tolu atu halo kapitalizasaun importante.

Dahuluk kapitalizasaun temi ida-ne’e sai soke ida banku nian bianhira fó kreditu ba setór privadu.

Daruak, kapitalizasaun tama ona iha planu negósiu 2018 to’o 2023 no sei kontinua fila-fali to’o 2028 ho alvu atu fó kreditu millaun $300.

Razaun datoluk mak hakarak prenxe rekezitu minimu konsensaun empréstimu ne’ebé mai hosi Banku Sentrál Timor-Leste (BCTL) ba kreditu empreza ki’ik no mídia.

“Husu deputadu sira atu haree didi’ak hosi perspetiva finansa ne’e saida no oinsá. Kuandu ita haree hosi likides, pur ezemplu, banku nian iha fulan-setembru liubá ita nota katak iha sira-nia relatóriu kona-ba kaixa disponivilidade hamutuk millaun $169 kompara ho fulan-juñu de’it millaun $124 no iha tinan kotuk millaun $59 ne’e kona-ba kaixa disponvilidade hosi BCTL,” nia dehan.

Nia dehan, agora haree fila-fali ba aplikasaun instituisaun kréditu iha fulan-setembru hamutuk millaun $118 konpara ho fulan-juñu millaun $92 no tinan kotuk millaun $45, nune’e konta hamutuk osan sira-ne’e kaixa ho aplikasaun haree katak sira-nia likides liu millaun $280.

“Hanoin kona-ba intermus likedes laiha problema. Agora BNCTL ninia balansu kapitál iha millaun $35, purtantu proposta ne’e atu akresenta millaun $80 hamutuk sa’e ba millaun $115. Ida-ne’e ho intensaun atu reforsa solides BNCTL nian atu bele fó garantia ba depozitante sira ne’ebé nia osan rai hela iha banku no mós permite BNCTL atu hatun taxano jurus, nune’e bele empreza sira aban-bainrua foti kreditu sira bele kmaan uitoan,” nia dehan.

Haree hosi relatóriu iha fulan-juñu, BNCTL fó kreditu amutuk millaun $138 no setembru nia laran millaun $147 kompara ho tinan kotuk millaun $108.

“Ida-ne’e apezar distintu deputadu sira hanoin hetan katak ita retira millaun $40 ne’ebé tuir loloos aloka iha tinan ida-ne’e, tanba atu selu programa Cesta Bázika. Nune’e, se ita haree situasaun líkida millaun $56 tau tan kréditu ba kliente sira millaun $147 no tau tan debitu ka osan sira-ne’ebé kliente rai hela iha banku millaun $376, mak kompara ho fulan-juñu millaun $292 mak BNCTL la presiza reforsa ninia kapitál,” nia hateten.

Entaun se reforsa osan kapitalizasaun ida-ne’e atu hatán taxa no jurus, prodús osan baratu nune’e presiza hatene loloos se oferta ne’ebé BNCTL sei tau iha merkadu kondiz ona ho demanda ba kréditu ne’e rasik.

Taxa no jurus iha nasaun defaktu sei aas ho 10% ba leten no atu hatán taxa no jurus ne’e tenke bazea ba analiza ne’ebé merkadu, tanba merkadu mak sei deside nivél presu. Labele deside arbiru no pior seidauk iha instrumentu atu regula taxa no juru iha Timor-Leste.

Hosi parte demanda mezmu Governu deside asume responsavilida 80% hosi kréditu sira-ne’e maibé haree katak ema barak tebes la hatudu interese ba kréditu, entaun signifika demanda presiza haree.

“Kuandu ita haree relatóriu hosi banku estranjeiru sira seluk ne’ebé iha sira la fó kréditu tanba la’ós likides maibé tanba projetu investimentu sira risku boot ida-ne’e mak kestaun. No, iha pasadu ita iha ona istória kréditu paradu, tan ne’e afeta ona banku ida hanesan BNU obriga halo right of,” nia hateten.

Nune’e, ministru hateten, Governu aseita ho proposta númeru 44 no la aseita proposta númeru 43 tanba tuir MKAE katak kapitalizasaun BNCTL ho fazeadamente.

Jornalista : Nelson de Sousa

Editór      : Cancio Ximenes

iklan
iklan

Leave a Reply

iklan
error: Content is protected !!