BOBONARO, 11 dezembru 2021 (TATOLI)—FALINTIL-Forsa Defeza Timor-Leste (F-FDTL) liuhosi ekipa Forsa Amiga, iha sábadu ne’e, halo simulasaun asaltu hodi hadau baze inimigu, iha aldeia Harame-laran, suku Aidaba-leten, postu Atabae, munisípiu Bobonaro.
Tuir Komandante Postu Tátiku Ezersísiu Cobra 21-2 no atuál Komandante Aero F-FDTL, Tenente Koronel, Helder da Costa, ezersísiu ohin tuir senáriu ne’ebé Forsa Amiga prepara hodi netraliza situasaun iha komunidade nia le’et no ezersísiu ne’e hanesan atividade kontinuasaun.
“Forsa Amiga F-FDTL durante semana-ida iha ai-laran halo operasaun bazeia ba senáriu ne’ebé iha no sira-nia misaun maka atu kombate inimigu no ikus mak deteta katak inimigu nia baze maka iha ne’e no destroi inimigu nia pozisaun,” Komandante Postu Tátiku Ezersísiu Cobra 21-2, informa iha aldeia Damlaran.
Notísia relevante: F-FDTL Korpu Fujileiru Navál halo ezersísiu simulasaun hosi tasi mai rai-maran
Tuir senáriu Militár, Forsa apoiu Amiga buka inimigu sira, tanba konsidera hanesan ameasa ba komunidade, ne’ebé inimigu sira ne’e kompostu hosi grupu kiik ida hosi Unidade FALINTIL no Korpu Fujileiru Navál.
“Forsa apoiu Amiga F-FDTL nia misaun mak halo buska no hasai inimigu sira hosi sira-nia baze,” Koronel esplika.
Aleinde ne’e, membru F-FDTL sira sempre treinu hodi hala’o misaun Nasaun Unida karik presiza, tanba ne’e iha ámbitu Ezersísiu Cobra 21-2, Forsa sira de’it maka halo, maibé iha oportunidade seluk halo ezersísiu hamutuk ho país ne’ebé iha ona kooperasaun hanesan Austrália no Nova Zelándia.
“Uluk, Forsa Nasaun Unida sira mai no ita mós konsege apoiu ona sira, agora ita prontu ona atu hala’o misaun Militár apoiu paz nian,” Tenente Koronel akresenta.
Iha ezersísiu tiru-malu, inimigu sira konsege hakanek membru Forsa Amigu F-FDTL ida iha parte ain, ne’ebé iha biban ne’e kedan unidade médiku hosi Militár konsege halo tratamentu urjente.
Jornalista : Francisco Sony
Editora : Julia Chatarina
