BOBONARO, 14 dezembru 2021 (TATOLI) – Diretór Ezersisíu Cobra 21-2 atuál Xefe Estadu Maiór F-FDTL, Brigaderu Jenerál Calisto dos Santos “Coliati”, hateten ezersisíu Cobra 21-2 ho objetivu teste kapasidade prontidaun tropa sira hodi hasoru kualkér situasaun.
“Ezersisíu ida-ne’e atu teste kapasidade prontidaun tropa ninian, se karik iha situasaun ruma ne’ebé nesesáriu ita-nia estadu ka governu husu tropa kalan ka loron tenke pronto,” Xefe Estadu Maiór F-FDTL, Brigaderu Jenerál, Calisto Santos “Coliati”, informa asuntu ne’e bainhira halo vizita ba membru ezersísiu Cobra 21-2 iha postu Tunubibi, tersa ne’e.
Kada tinan forsa fujileiru hosi komponente Navál no Terrestre sempre hala’o ezersisíu Cobra ida-ne’e atu haree kapasidade prontidun membru F-FDTL nian.
Coliati dehan, ezersisíu ida-ne’e mós atu halo mantensaun ba sira-nia prontidaun iha tékniku no tátika operasaun oinsá maka halo funu. Nune’e mós atu teste kapasidade apoia lojístika materiál funu no konsumu ninian.
Nune’e difikuldade sira-ne’ebé F-FDTL hetan iha terrenu, parte ida atu teste sira-nia kapasidade fisikolójikamente oinsá maka bele responde ba kualkér situasaun.
“Hanesan militár ami labele dehan bainhira maka atu funu maibé militár nia objetivu maka prepara nia misaun sira,” nia tenik.
Maibé nia fó-sai katak, polítika sira presiza halo investimentu ba F-FDTL ligada ba atividade ezersisíu sira.
“Problema ne’ebé sira enfrenta la hamate espíritu militár ninian atubele prontu nafatin no prepara-aan bainhira udan no anin atu mai, ami bele fó resposta,” nia argumenta.
Entretantu, Xefe Estadu Maiór Jenerál F-FDTL, Tenente Jenerál Lere Anan Timur, sei hato’o relatóriu finál hosi ezersísiu ne’e ba Ministru Defeza, Filomeno Paixão de Jesus atubele konsidera iha planu asaun anuál.
Jornalista : Francisco Sony
Editór : Evaristo Soares Martins
