BAUCAU, 15 dezembru 2021 (TATOLI) – Governu liuhosi Sekretaria Estadu Protesaun Sivil (SEPS) apoia materiál konstrusaun ba vítima dezastre naturál na’in-15 iha munisípiu Baucau.
Sekretáriu Estadu Protesaun Sivíl, Joaquim Gusmão dos Reis Martins, hateten, apoia komunitária ne’e hanesan parte hosi programa protesaun sivíl nian bainhira akontese dezastre naturál ruma iha Timor-Leste.
Joaquim esplika, apoia ba vítima iha kategoria rua hanesan emerjénsia apoia uluk hahán no nesesidade bázika, enkuantu apoia materiál konstrusaun hafoin halo verifikasaun.
“Ita apoia materiál konstrusaun hanesan simentu, kalen, besi, arame no pregu ne’ebé kategoria tolu hanesan aat totál, kmaan no natoon. Apoia materiál konstrusaun ne’e ba rekuperasaun uma ba inundasaun loron 4 fulan-abríl nian,” Joaquim hateten iha Vila Nova, kuarta ne’e.
Nia fó-sai katak, postu administrativu Baucau Villa nian iha família tolu (suku Uailili rua no Seisal nain-ida), Laga iha uma-kain rua, Quelicai iha uma-kain haat no Venilale iha uma-kain neen nune’e totál vitima dezastre naturál iha munisípiu Baucau hamutuk uma-kain 15.
Hosi família uma-kain 15 komposta hosi aat-kmaan hamutuk uma-kain haat no aat-total iha uma-kain 11.
SEPS mós apoia orsamentu ba vítima dezastre naturál iha Baucau hamutuk $5.400 ne’ebé kada família hetan $360 ne’ebé utiliza ba mão de obra no arranja ba ai-kuadradu.
Kona-ba akontesimentu iha loron 09 dezembru kona-ba inséndiu iha aldeia Larigua, suku Haeconi, postu administrativu Baguia rezulta uma-ida aat totál, SEPS liuhosi Servisu Munisipál Protesaun Sivíl Baucau apoia emerjénsia nesesidade bázika.
Vítima dezastre naturál hosi suku Uailili, Simão Freitas, haksolok no hato’o agradese ba governu ne’ebé apoia ona materiál konstrusaun inklui osan uituon.
Simão rasik nu’udar vítima ba inséndiu ne’ebé akontese iha aldeia Modoho’o, iha loron 24 fulan-agostu ne’ebé rezulta ahi-haan uma rua no uma-lisan tolu.
SEPS prepara planu sokorru
Iha parte seluk, Sekretáriu Estadu Protesaun Sivíl, Joaquim Gusmão dos Reis Martins, fó-sai katak, sei prepara planu sokooru iha munisípiu Baucau.
Nia akresenta, konsellu ministru aprova ona autoridade protesaun sívil no sei promulga hosi Prezidente Repúblika nune’e sei harii mós iha munisípiu.
”Ita-nia planu sei prepara sokorru médiu mai Baucau tuir kondisaun infraestrutura estrada,” Joaquim informa.
SEPS mós sei sosa viatura espesializada ba Bombeiru Baucau tanba konsidera hanesan sidade daruak iha Timor-Leste.
Nia argumenta, planu ne’e halo hodi apoia emerjénsia iha munisípiu ho di’ak, liuliu atendimentu bainhira mosu dezastre naturál hanesan inundasaun no inséndiu.
Bombeiru Baucau dadaun ne’e iha de’it karreta ida nune’e difikulta atu hala’o serbisu relasiona ho akontesimentu dezastre naturál no inséndiu iha munisípiu refere.
Totál funsionáriu iha Korpu Bombeiru Munisípiu Baucau hamutuk 22 ne’ebé kada loron fahe ba ekipa tolu hodi atende komunidade durante oras 24.
Jornalista : Natalino Belo
Editór : Evaristo Soares Martins
