HNGV rekolla reseita $214,808.33 iha janeiru to’o novembru
DILI, 15 dezembru 2021 (TATOLI)— Diretór Administrasaun, Finansa no Apoia Lojístiku Hopsitál Nasionál Guido Valadares (HNGV), Raul Humberto Gama, informa, hahú iha fulan-janeiru to’o novembru konsege rekolla reseita hamutuk $214,808.33.
HNGV rekolla reseita $214,808.33 hosi fonte sala Enfermaria, sala VIP, Laboratóriu, Medical checkup, sala operasaun, maternidade no trata atetadu médiku.
“Ha’u seidauk identifika fonte ida ne’ebé mak reseita sa’e liu, maibé orsamentu sira ne’e mak HNGV konsege rekolla reseita ne’e ba kofre Estadu,” Diretór ne’e, informa ba jornalista sira iha nia kna’ar fatin HNGV-Bidau, kuarta ne’e.
Notísia Relevante: OJE 2022: HNGV prevee millaun $11 finansia programa rua
Parlamentu Nasionál, tersa ne’e, aprova Orsamentu Jerál Estadu (OJE) 2022 ba Hospitál Nasionál Guido Valadares (HNGV) ho montante $11.007.875 iha espesialidade.
Hosi totál $11.007.875 fahe ba kategoria salariu no vensimentu $5.992.132, bens no servisu $3.915.956, kapitál menór $500.000, kapitál dezenvolvimentu $599.787
“Kona-ba orsamentu ba tinan oin prioridade tenke sosa ekipamentu iha área medikamentu nian tanba iha kapitál menór sira tau orsamentu $500.000,” nia akresenta.
Daudaun, HNGV nia espasu la sufisiente ba pasiente sira ne’ebé balun toba iha koridór, tanba loloos akumula pasiente na’in-350, maibé daudaun sa’e ba 400.
“Uluk sei tama iha situsasaun normál HNGV kada loron simu pasiente 150, maibé agora númeru pasiente sa’e maka’as, tanba ne’e mak pasiente balun hela koridór. Maibé médiku sira kontinua halo tratamentu ba sira,” nia akresenta.
Nune’e, HNGV iha faze elaborasaun ba espansaun fatin liuliu atu halo konstrusaun foun, ne’ebé Ministériu Saúde servisu hamutuk ho Ministériu Obra Públika atu kontrata kompañia halo levantamentu ba konstrusaun ospitál ne’e.
Notísia Relevante: OJE 2022: PN aprova $11.007.875 ba HNGV iha espesialidade
Jornalista : Felicidade Ximenes
Editór : Florencio Miranda Ximenes
