DILI, 20 dezembru 2021 (TATOLI)— Konsellu Superiór Polísia Nasionál Timor-Leste (KS-PNTL), segunda ne’e, halo reuniaun koordenasaun hodi fahe hanoin kona-ba propsota demisaun ba member na’in-haat ne;ebé komete irregularidade iha sira-nia knaar loro-loron nian.
Sekretária Konsellu Superiór, Superintendente Xefe Carlos Jeronimo, hateten, objetivu hosi reuniaun Kosellu Superiór atu prosesa kazu indixiplinár ne’ebé komete hosi membru PNTL na’in-haat no mós halo avaliasaun ba progresu servisu institusaun PNTL nian iha 2021 hodi projeta ba 2022.
“Iha kazu disiplinar ne’e iha prosesu haat liuliu ba membru PNTL na’in-haat. Ohin delibera hotu ona. Komadante hotu-hotu fó ninian opiniaun ba deliberasaun ne’e no sei tetu fila-fali. Ita hein iha tempu badak sei hatene nia rezultadu,” Sekretária Konsellu Superiór ne’e, hateten, hateten, ba Jornalista sira iha hafoin ramata reuniaun KS, iha Kuartél Jerál PNTL Caicoli.
Superintendente Xefe Carlos informa, membru PNTL nain-haat ne’e komete indixiplinár iha tinan 2020.
“Sira nain haat ne’e, iha feto no iha mane, maibe ha’u la fó inisiál ba imi no ha’u lakohi esplika klean sira nain-haat ne’e komete tipu kazu saida, maibé atu dehan de’it sira nain-haat komete indixiplinar no konserteza liuhosi reuniuan Konsellu Superiór balun sei hetan demisaun,” nia haktuir.
Reuniaun Konsellu Superiór ne’e prezidente hosi Komandante Jerál akompaña hosi Segundu Komandante Jerál no partisipa hosi Komandante Munisípiu no Komandante Unidade sira.
Jornalista : Natalino Costa
Editór : Florencio Miranda Ximenes
