DILI, 23 dezembru 2021 (TATOLI)—Ministériu Turizmu, Komérsiu no Indústria (MTKI) liuhosi Inspesaun Jerál Jogu (IGJ) realiza natál hamutuk no iha ámbitu ne’e fahe nesesidade bázika ba abitante ho rendimentu menus hosi suku Becora, Comoro, Bemori, Akadiri-hun, Santa Cruz no Lahane Orientál.
Inspetór Jerál Jogu, Domingos da Costa Guterres, hateten, atividade ne’e nu’udar parte ida atu festeza natál hamutuk no biban ne’e IGJ ho domin hakarak oferese nesesidade bázika ba komunidade, nu’udar grasa loron boot natál no tinan foun 2022.
“Biban ne’e fahe prenda natál ba komunidade, ne’ebé kbiit sira mai hosi konsensionáriu sira hodi oferese direta ba benefisiáriu sira, hanesan domin iha loron boot,” Inspetór Jeral Jogu, hateten iha ámbitu festeza natál hamutuk iha resintu IGJ, iha Bebora, kinta ne’e.
Apoia ne’e hosi grupu jogu tradisionál hanesan Bola Guling no rotaria legál neen Amizade, Timor Pull, Rudal, Kiss, Bedford, Grand Dragon Lotary, inklui Toto Bola hanesan Sucesso Hamutuk Lda, Brisqiu 04, no Slot Mákina rua hanesan MTG Holding no Timor Holding.
Nesesidade bázika sira ne’ebé fahe mak hanesan foos, supermie, mina bimoli, no deterjente, no seluk tan.
Iha biban hanesan, Vise-Ministra Turizmu Komunitáriu no Kulturál, Inácia da Conceição Teixeira, apresia ho inisiativa IGJ tanba bele realiza ona atividade.
“Agradese tebes tanba Inspesaun Jogu loke fali sira-nia matan no liras hodi bele haree filafali ba komunidade,” Vise-Ministra apresia.
Nune’e, governante ne’e espera eventu ne’e bele hametin relasaun diretamente entre instituisaun Governu ho komunidade tanba dala-ruma asuntu ne’ebé liga ho serbisu ne’e fasil atu estabelese ho nível a’as de’it, maibé ho atividade ne’e bele koñese malu liu, nune’e atividade ne’ebé Governu halo bele diretamente iha impaktu ba sira ne’ebé presiza tebes.
“Ha’u fiar katak sasán sira ne’ebé oferese la’ós de’it hosi ministériu sira maibé hosi mós empreza jogu, tanba saida mak sira hetan, la haluha fó filafali ba komunidade,” Vise-Ministra dehan.
Reprezenta benefisiáriu, Agusto Sarmento, agradese ba IGJ tanba bele ajuda sasán iha ámbitu loron boot.
“Ami durante ne’e seidauk hetan hanesan ne’e, foin dahuluk ami hetan, tanba ne’e agradese tebes,” Agusto tenik.
Jornalista : Antónia Gusmão
Editora : Julia Chatarina
