DILI, 05 janeiru 2022 (TATOLI)– Sekretáriu Estadu Juventude no Desportu (SEJD), Abrão Saldanha, informa, iha tinan ne’e, Governu nafatin apoia orsamentu $200.000 ba Liga Futeból Timor-Leste (LFTL).
“Ita nafatin fó apoia LFTL atu hala’o Liga iha 2022, maibé orsamentu la másimu hanesan uluk tanba liga la’o di’ak ona. Ita sei husik no fó atensaun liubá liga juvenil. Nune’e orsamentu ba LFTL iha 2022 ne’e, ita sei fó $200.000 hodi bele hala’o jogu,” SEJD Abrão, hateten ba Agência TATOLI iha edifisiu SEJD-Lecidere, kuarta ne’e.
Molok ne’e, SEJD dehan kada tinan Governu tau osan hamutuk $300.000 ba LFTL hodi hala’o atividade, maibé iha 2022 tenke hatun hodi hodi fó biban ba LFTL atu buka meiu atu hetan osan liuhosi patrosinadór-sira.
Daudaun ne’e, LFTL iha klube segunda no primeiru divizaun hamutuk 21, kompostu hosi primeira divizaun hamutuk 10 hanesan, Karketu Dili FC, Lalenok United FC, Aitana FC, Assalam FC, Emanuel FC, AD SLB Laulara, Academica FC, Atletico Ultramar no AS Ponta Leste.
Enkuantu, iha Segunda divizaun mak klubu Kablaki FC, Lika-Lika Lemorai FC, AS Marca FC, Nagardjo FC, DIT FC, Santa Cruz FC, Boavista FC Timor, FIEL FC, Portu Taibessi FC no Zebra FC.
Orsamentu Jerál Estadu 2022 ba SEJD ho montante $6,583.318, ne’ebé aloka ba saláriu vensimentu $638.496, bens no servisu $1,402.400, transferénsia públika $3.562.279, kapitál menór $600.000 no kapitál dezenvolvimentu $380.143, no orsamentu ne’e sei finansia ba programa rua (2), sub-programa lima (5) no atividade (19).
Programa boa-governasaun no jestaun instituisionál sei gasta $2,351.216 no programa igualidade jéneru no inkluzaun sosiál sei gasta $4,232.102.
Programa igualidade jéneru no inkluzaun sosiál ho nia objetivu médiu prazu joven timorense ho idade 12 to’o 30 dezenvolve sira-nia telentu, dezempeñu no espirítu kompetetivu no grupu joven promove ho envolvimentu iha sosiedade sivíl.
Sub-programa dezenvolvimentu área desportu ho nia atividade jestaun operasionál KRAM, realiza eventu nasionál iha área desportu, dezenvolve kapasidade instituisional iha organizasaun desportiva, dezenvolve rekursu umanu iha área desportu.
Sub-programa dezenvolvimentu iha área juventude ho atividade realiza eventu nasionál iha área juventude, dezenvolvimentu ba kapasidade instituisionál organizasaun juventude, dezenvolve kapasidade rekursu umanu ba joven, insentivu ba empreendedorizmu sosiál ba joventude iha suku.
Sub-programa dezenvolvimentu infraestrutura no fasilita área juventude ho desportu ho atividade konstrusaun kampu multifunsaun iha Taibesi, konstrusaun kampu komunitáriu, konstrusaun no reabilitasaun edifísiu SEJD, reabilitasaun kampu tenis iha UNTL.
Entretantu, programa boa-governasaun no jestaun instituisionál ho nia sub-programa rua (2) no atividade hitu (7).
Jornalista : Hortencio Sanchez
Editór : Florencio Miranda Ximenes
