HEADLINE, LIQUIÇÁ, MUNISÍPIU

Asosiasaun Estudante Liquiçá husu rezolve lixeira Tibar labele fó impaktu saúde

Asosiasaun Estudante Liquiçá husu rezolve lixeira Tibar labele fó impaktu saúde

Atividade joven na'in-tolu bainhira hili sasán uzadu hanesan kalen no besi-aat sira-ne’ebé soe iha lixeiru Tibar, sesta (05/02/2021). Imajen TATOLI/António Gonçalves

LIQUIÇÁ, 12 janeiru 2022—Asosiasaun Estudante Liquiçá husu ba Governu atu rezolve halo jestaun lixu iha lixeira Tibar, nune’e labele fó impaktu ba saúde populasaun ne’ebé hela besik área ne’e.

“Durante ne’e ami halo serbisu kontrolu sosiál no ami sempre komunga liafuan katak dezenvolvimentu nasaun la’ós obra nai ulun sira-nia mesak, maibé presiza envolve povu. Ami la’o hodi kontribui ba rai Liquiçá hodi halo kontrolu, ho ida-ne’e ami preokupa tebes ba lixeira Tibar tanba lixu ne’e hosi Dili, tanba sá mak tenki tau iha munisípiu Liquiçá,” Prezidente Asosiasaun Estudante Liquiçá, Nelson da Silva Soares, hateten, iha ámbitu diálogu komunitáriu Primeiru-Ministru (PM), Taur Matan Ruak, no komitiva iha resintu Administrasaun Liquiçá, kuarta ne’e.

Notísia relevante: PN husu Autoridade Munisípiu Dili halo jestaun ba lixeiru Tibar

Tuir Reprezentante estudante, bainhira lixu hotu tenke fakar iha Tibar fó impaktu tebes ba komunidade, enkuantu tuir Konstituisaun artigu 61 númeru 1, hateten katak ema tenke habelun di’ak ho natureza, maibé kuandu dadeer la’o hosi Liquiçá bá Dili haree ai-suar hafutar Tibar.

“Tanba ne’e, husu Autoridade munisípiu Dili mak kontrola foer sira iha Dili. Ami Asosiasaun Estudante só hatene raut foer maibé la hatene soe foer. Durante ne’e lixu sira soe arbiru de’it, ida-ne’e kuandu udan tun bele provoka inundasaun no hafoer Dili nu’udar sidade nasaun nian,” nia tenik.

Transforma lixu sai modelu aterru kontroladu

Hatán ba preokupasaun ne’e, Ministru Administrasaun Estatál (MAE), Miguel Pereira de Carvalho, hateten, Governu liuhosi munisípiu Dili planeia ona atu transforma lixu Tibar ho modelu aterru kontroladu.

“Hakarak informa ba populasaun Liquiçá katak Governu embarka ho projetu ida atu traforma lixeira Tibar ho forma ida hanesan agora ba aterru kontrolu,” Ministru Miguel informa.

Projetu ne’e Governu asina ona kontratu no tempu badak sei trasforma lixeiru Tibar ne’e ba aterru kontroladu, katak faze dahuluk sei hamate ahi sira ne’ebé suar hela iha lixeira Tibar.

“Ahi suar tanba ahi han hosi leten tun to’o kraik no ohin loron seluk seidauk maski udan mai, tanba ne’e maka liuhosi métodu aterru kontrolu ne’e bele kee sai tiha lixeiru ezistente halo mate tiha ahi sira, hafoin enxe fali lixu foun no diáriamente taka ho rai atu garante lixu sira lalar labele ba hobur, tanba ne’e maka sei trata lixeira Tibar ne’e ho forma kontroladu,” Ministru esplika.

Entretantu, lixeira Tibar diariamente prodús tonelada 220 hosi Dili no balun mai hosi Liquiçá.

Jornalista : Antónia Gusmão

Editora     : Julia Chatarina

iklan
iklan

Leave a Reply

iklan
error: Content is protected !!