HEADLINE, IMAJEN, JUSTISA, LEI, MUNISÍPIU, OÉ-CUSSE (RAEOA)

Deskonfia komete krime korrupsaun, CAC buska jerente seniór iha RAEOA 

Deskonfia komete krime korrupsaun, CAC buska jerente seniór iha RAEOA 

CAC halo buska-apreensaun ba emprezáriu no jerente boot ida iha RAEOA. Imajen mídia CAC.

DILI, 18 janeiru 2022 (TATOLI) – Investigadór sira hosi Komisaun Antí Korrupsaun (CAC, sigla portugués) ezekuta mandadu buska-apreensaun ba insiál MN iha Rejiaun Administrativa Espesiál Oé-Cusse Ambeno tanba deskonfia komete kazu krime brankamentu kapitál no korrupsaun.

“Operasaun loron ohin nian, ekipa investigadór CAC nian, hala’o iha Oé-Cusse, tanba iha indisiu forte arguidu sira komete kazu krime brankamentu kapitál artigu-313 Kódigu Penál Timor-Leste, kazu krime Korrupsaun pasiva no krime Korrupsaun ativa akontese iha área jurizdisaun Oé-Cusse nian,” Nota imprensa ne’ebé Agência Tatoli asesu iha pájina ofisiál CAC, tersa ne’e.

Ekipa investigadór CAC nian lidera hosi Diretór Investigasaun Kriminál (UIK) Emílio Quintas, akompaña ho Polísia Nasionál Servisu Investigasaun Kriminál (PNSIK), tersa ne’e ezekuta mandadu buska-apreensaun ba insiál MN nu’udar emprezáriu no jerente seniór atuál Adjuntu Prezidente Autoridade iha Rejiaun Administrativa Espesiál Oé-Cusse Ambeno (RAEOA).

Operasaun ne’e hala’o, hodi asegura mandadu Tribunál Distritál Oé-Cusse (TDO) nian ho númeru NUC 0057/21.PDOEC, loron 17/12/2021, iha fatin rua, iha jerente seniór rasik nia rezidénsia iha Sikluli.

Nune’e mós edifísiu kompañia nian iha bairru Padimau no hetan akompañamentu direta hosi prokuradór titulár no juiz ne’ebé hatún mandadu buska no apreensaun hosi juiz, Yudi Pamungkas.

CAC halo buska-apreensaun ba emprezáriu no jerente boot ida iha RAEOA. Imajen mídia CAC.

“Mandadu ne’e fó podér mai investigadór CAC nian hodi halo operasaun buska-apreensaun ba suspeitu diretór emprezáriu na’in-ida (1), hanesan mós subriñu hosi suspeitu seluk nu’udar jerente seniór iha RAEOA-ZEESM ho ninia espoza (co-autór ne’ebé posibilidade bele sai suspeitu) tanba deskonfia envolve iha kazu krime korrupsaun,” Nota imprensa ne’e informa.

Iha komunikadu imprensa ne’e sita katak, mandadu ba buska iha domisiliáriu no prende sasán ne’e, juiz mak haruka no fó orden atu halo buska iha domisiliáriu, ho posibilidade ba prende sasán ne’ebé mak iha ligasaun ho faktu hirak ne’ebé investiga ona, tuir dispozisaun iha ártigu-37 númeru-rua (2), hosi Konstituisaun Repúblika Timor-Leste, iha ártigu-226 no 1, alinea-C ártigu-108 númeru-ida (1), ‘artigu-170, hotu-hotu husi Kódigu Prosesu Penál (KPP) ba suspeitu ninian hela fatin.

“Orden ba halo buska ne’e konsede iha autu-inkéritu nian NUC S(ic.NUCNo), hosi ne’ebé investiga dadaun hela suspeitu kona-ba auto krime, p.p hosi ártigu kódigu penál nian,” sita iha komunikadu ne’e.

Ba kumprimenta efetivu ba mandadu ida-ne’e, iha autorizasaun ba asesu iha dependénsia hotu-hotu, inklui kofre, fatin hirak rai sasán nian, veíkulu hirak-ne’ebé uza hosi suspeitu, bele fera odamatan, hakat sa’e hosi moru no neutraliza animál sira, sé presija duni, ho observánsia ba dispozisaun iha artigu-169 no ártigu-170 hosi Kódigu Prosesu Penál Timor-Leste nian.

Operasaun buska-apreensaun ida ne’e dahuluk liu CAC hala’o iha munisipíu sai hosi kapitál Dili, iha istória CAC nian hafoin estabelese no operasiona iha tinan 2010 liubá bazea ba mandatu lei númeru-8/2009, 15 jullu.

Kazu ne’e rasik hetan delegasaun kompeténsia hosi Prokuradór Distritál Oé-Cusse hodi investigadór CAC sira iha podér lei halo prosesu investigasaun ho kuidadozu hanesan rona sasin sira, halibur dokumentu no halo survelénsia ba iha intervenenti prosesuál, liuliu arguidu nian bens sira.

Iha prosesu investigasaun naruk nian laran ne’e, revela indisiu krime forte hodi halo promosaun ba buska domisiliáriu hatuur iha artigu-170, no apreensaun artigu-172 Kódigu Prosesu Penál Timor-Leste, ne’ebé realiza iha tersa (18/1) iha arguidu ninia rezidénsia bairu Sikluli sub-rejiaun Pante Makassar.

Investigadór CAC sira sei halo investigasaun kle’an liután, hodi rekolla informasaun, evidénsia balun mensiona iha karta mandadu buska-apreensaun ne’e atu revela verdade.

Iha operasaun buska domisiliária no apreensaun loron ohin nian, investigadór CAC konsege halibur dokumentu lubun boot, mak hanesan konta bankária, osan-mean, osan cash ho montante boot.

Nune’e mós dokumentu kompañia nian, telefone no dokumentu sobre projetu eletrifikasaun, projetus cleaning services no projetu balun iha Oé-Cusse, ne’ebé suspeitu ho ninia espoza nian kompañia manán nu’udar evidénsia no objetivu krime.

Jornalista         : Abílio Elo Nini
Editór               : Evaristo Soares Martins

iklan
iklan

Leave a Reply

iklan
error: Content is protected !!