EKONOMIA, HEADLINE

ACCCTO prontu serbisu hamutuk Governu aselera dezenvolvimentu

ACCCTO prontu serbisu hamutuk Governu aselera dezenvolvimentu

Prezidente Komunidade Xineza Timor-Leste, Kathleen Gonçalves. Imajen Tatoli/Felicidade Ximenes

DILI, 01 fevereiru 2022 (TATOLI)—Prezidente Asosiasaun Komersiál Komunidade Xineza iha Timor-Leste (ACCCTO, sigla portugés), Kathleen Gonçalves, hateten, asosiasaun ne’ebé maioria emprezáriu ne’e prontu serbisu hamutuk ho Governu atu aselera dezenvolvimentu iha país ne’e.

“Iha ami-nia asosiasaun maioria emprezáriu de’it, la’ós foin agora maibé uluk kedan ami serbisu ho ita-nia Governu atu haree ba dezenvolvimentu ne’ebé la’o hela,” Prezidente ACCCTO hateten ba Agência TATOLI, iha resintu Xina Maromak, Bairro Formosa, tersa ne’e.

Nia dehan, komunidade xineza timor-oan sempre hamutuk iha país ne’e, iha tempu difísil to’o ukun rasik-an hodi kontribui ba dezenvolvimentu.

“Uluk kedas ami sempre apoiu Timor-Leste iha situasaun difísil mós ami apoiu, agora mós ami hamriik metin apiu Estadu ida-ne’e, ami la halo polítika maibé ami apoiu polítika saida de’it iha país ne’e,” nia akresenta.

Apoiu ne’ebé durante ne’e asosiasaun fó, barak liu ba dezenvolvimentu iha setór ekonomia.

Tuir nia, prosesu dezenvolvimentu iha país ne’e la’o di’ak maibé tanba surtu COVID-19 mak halo buat hotu paradu, maibé ho polítika Governu no esforsu hosi parte hotu, daudaun ekonomia rai-laran hahú rekupera.

Daudaun ne’e membru ACCCTO hamutuk na’in-10.000 resin.
ACCCTO nu’udar organizasaun istóriku harii desde tinan 1912, ne’ebé komunidade xineza sira husik hela ba beioan sira iha Timor-Leste atu kontinua dezenvolve to’o ohin loron.

Durante ne’e, asosiasaun ne’e halibur no tau-matan ba atividade negósiu no sai perseiru Governu hodi dezenvolve ekonomia rai-laran, inklui defende membru sira-nia direitu.

Jornalista : Hortencio Sanchez
Editora      : Julia Chatarina

iklan
iklan

Leave a Reply

iklan
error: Content is protected !!