Governu dezeja F-FDTL kontinua profisionaliza iha futuru
DILI, 02 fevereiru 2022 (TATOLI)—Relasiona ho selebrasaun loron aniversáriu transformasaun FALINTIL ba FALINTIL-Forsa Defeza Timor-Leste (F-FDTL) ba dala-21 (2000-2022), Governu dezeja instituisaun ne’e kontinua profisionaliza iha futuru hodi serví povu no nasaun.
“Dezeja susesu ba F-FDTL ne’ebé maka foun, prezerva istória no legadu importante sira hosi ita-nia luta ba ukun rasik-an,” Ministru Prezidénsia Konesellu Ministru, Fidelis Manuel Leite Magalhães, informa hafoin reuniaun ezekutivu, iha Palásiu Governu, kuarta ne’e.
Portavoz Governu ne’e akresenta, F-FDTL tranforma hosi FALINTIL tenke kontinua nafatin espíritu abnegasaun sakrifísiu istória FALINTIL nian.
“Fiar katak ho tempu satán foin lalais, foin sa’e sira integra tan iha F-FDTL, atu nune’e profisionaliza liután ita-nia forsa defeza,” nia akresenta.
Nune’e, nia husu atu F-FDTL kontinua serbisu ho di’ak atu sai liman kro’at povu nian, no mós kontribui ba dezenvolvimentu nasionál liliu kontinua hanesan forsa ne’ebé maka la’ós partidáriu, mantein disiplina, no hanesan pesa importante ida ba demokrasia no liberdade nasionál.
“Ba defeza no demokrasia, bainhira forsa defeza mantein ninia knaar tuir Konstituisaun Tepúblika Demokrátika Timor-Leste (RDTL), tenke kontinua profisionaliza liután iha futuru,” nia espera.
Jornalista : Antónia Gusmão
Editora : Julia Chatarina
