DILI, 02 fevereiru 2022 (TATOLI)–Ministru Petróleu no Minerál, Víctor da Conceição Soares, hasoru malu ho Primeiru-Ministru (PM), Taur Matan Ruak, hodi atualiza informasaun inisiál liga ho dezenvolvimentu petrolíferu tanba semana oin Xefe Governu sei vizita Austrália, nune’e bele komunika kestaun balun ho parseiru.
“Primeiru-Ministru atu desloka ba Austrália hodi hasoru malu ho ninia omólogu Primeiru-Ministru austrálianu tanba iha kestaun balun atu diskute, tanba ne’e mak ha’u mai hasoru atu fó informasaun nesesáriu ba Primeiru-Ministru,” Ministru Víctor relata, hafoin hasoru Xefe Governu, iha Rezidénsia Farol, kuarta ne’e.
Nune’e, informasaun ne’ebé governante ne’e relata ba Xefe Ezekutivu, ligadu ho kooperasaun Austrália hanesan progresu Greater Sunrise no atividade empreza australiana, Timor Resources iha Timor-Leste.
Notísia relevante: ANPM iha alvu tinan ne’e kompleta enkuadramentu legál-fiskál Greater Sunrise
“Kona-ba progresu kampu Greater Sunrise, diskusaun ne’ebé halo ho Austrália la’o no iha ona intendimentu mutuál ne’ebé di’ak tebes. Dokumentu sira daudaun tau iha meza diskusaun no mós lei tributária balun ba rejime espesiál Greater Sunrise, ne’ebé durante diskusaun sira la’o via virtuál, maibé iha faze ne’e Timor-Leste no Austrália hakarak hasoru malu diretamente,” governante ne’e esklarese.
Ligadu ho ida-ne’e, semana oin ekipa Autoridade Nasionál Petróleu no Minerál (ANPM) sei desloka ba Austrália hodi halo diskusaun intensivu, tanba iha projesaun to’o fin tinan 2022 hakarak konklui projetu ne’e no avansa ba asinatura, atu nune’e bele tama ba faze dezenvolvimentu Greater Sunrise.
Kooperasaun seluk mak Institutu Petróleu no Jeolojia (IPG, sigla portugés) durante ne’e inisia hela akordu kooperasaun ida ho Geoscience australianu.
Jornalista : Antónia Gusmão
Editora : Julia Chatarina
