Saku biodegradável menus kompradór
DILI, 02 favereiru 2022 (TATOLI)–Na’in ba loja Marfazas, Francisca Barreto Martins, ne’ebé nu’udar utilizadór saku biodegradável iha loja, hateten, sente lakon bainhira uza saku biodegradável, tanba menus kompradór.
“Desde Governu hasai polítika zero plástiku, ami sosa kedas saku biodegradável ho objetivu atu apoiu polítika Governu, maibé difikuldade ne’ebé ami hasoru mak bainhira kompradór sira mai sosa sasán no ita atu tau ba saku, sira dehan osan laiha atu sosa saku ne’e ho folin $0,25 to’o $0,75,” Francisca Barreto, hateten ba Agência TATOLI, iha Bairro Pité, kuarta ne’e.
Nune’e, nia konsidera implementasaun dekretu-lei númeru 37/2020 loron 23 setembru kona-ba alienasaun, importasaun no produsaun saku, embalajen no objetivu seluk ba plástiku, ne’e di’ak maibé presiza haree ba kondisaun.
“Governu bandu uza plástiku, entaun tenke aranja saku biodegradável ne’e ba komunidade hodi bele uza, tanba loja na’in rasik mak hasai osan ba sosa saku sira ne’e, maibé kompradór sira lakohi sosa hodi uza no fó impaktu fali ba loja na’in sira. Ita sosa mai saugati de’it, ne’ebé hakarak ka lakohi ami uza nafatin plástiku, maski plástiku ne’e rasik Governu bandu,” nia akresenta.
Notísia relevante: SEA Apresia Supermerkadu Hitu iha Dili Promove Polítika Zero Plástiku
Nune’e mós, na’in ba loja Sofya, Maria de Jesus, hateten, durante sira uza saku biodegradável, kompradór sira ne’ebé atu sosa menus ho razaun osan laiha, entaun kontinua uza saku plástiku.
“Plástiku ne’ebé ami uza sosa iha rai-laran hosi kompañia Pasific Treasure, karón ida $75,” nia dehan.
Iha sorin seluk, Vendedór saku plástiku, António Fernandes, dehan nia parte seidauk hetan informasaun kona-ba implementasaun polítika zero plástiku.
“Ha’u rasik seidauk rona kona-ba Governu nia polítika zero plástiku, karik polítika ne’e dehan hapara fa’an plástiku, ha’u lahatene, ha’u fa’an ema nia de’it no ema fó persen ba ha’u,” nia akresenta.
Diretór Pacific Treasure Unipesoál Lda, Teofilo Yap, hateten, nia parte hatama saku plástiku tanba hetan autorizasaun hosi Governu liuhosi Sekretáriu Estadu Meiu Ambiente (SEA).
“Plástiku ne’ebé ami fa’an hetan autorizasaun hosi Governu, tanba plástiku ne’ebé ha’u hatama ne’e kresek ho marka oxfo-biodegradável, tipu plástiku d2w, ne’ebé bele proteje ambiente hotu no plástiku ne’e rasik ami sosa hosi nasaun Xina,” nia dehan.
Jornalista : Arminda Fonseca
Editora : Julia Chatarina
