Saúde RAEOA hahú halo asaun prevensaun kombate dengue

DILI, 02 fevereiru 2022 (TATOLI) – Diresaun Servisu Saúde Rejiaun Administrativa Espesiál Oé-Cusse Ambeno (RAEOA), liuhosi departamentu moras kontajioza no la’ós kontajioza hamutuk ho departamentu promosaun iha semana ne’e, hahú halo ona asaun prevensaun hodi rega susuk iha sub-rejiaun Pante Makasar no Nítibe hodi kombate moras dengue iha rejiaun ne’e.

Sekretáriu Rejionál ba Asuntu Saúde, Manuel da Costa, informa objetivu intervensaun ne’e atu kombate moras dengue tanba bazea ba investigasaun no identifikasaun ne’ebé deteta iha Hospital Referál Oé-Cusse iha ona kazu tolu (3).

“Tanba ne’e mak ita orienta ekipa sira, halo promosaun no edukasaun ba komunidade sira-ne’ebé konsidera risku ba dengue, no halo fumigasaun ba uma-kain no viziñu sira-ne’ebé identifika mosu kazu hirak-ne’e, ita bele motiva sira halo limpeza ka hamoos fatin sira-ne’ebé besik iha uma oin,” Manuel da Costa, informa ba Agência Tatoli liuhosi telefónika, kuarta ne’e.

Nia fó-sai katak, ekipa saúde halo ona fumigasaun iha fatin rua, sub-rejiaun Nítibe iha Baoknana no iha sub-rejiaun Pante Makasar iha bairru Palaban, suku Costa.

Tuir planu sei kobre hotu sub-rejiaun Oésilo no Pásabe, tanba ekipamentu mákina no ai-moruk rega susuk nian iha estoke sufisiente atu fó atendimentu ba atividade ne’e.

Nia hatutan, kona-ba fatin preparasaun karik iha futuru númeru kazu dengue sa’e, daudaun ne’e diresaun servisu saúde rejionál prepara ona fatin provizóriu iha kuarentena Kiumaonteko iha suku Costa.

Ekipa saúde RAEOA aviza ona ba lideransa komutária atu enkoraja komunidade sira, hodi halo asaun limpeza iha kada uam-kain, bairru laran, nune’e bele prevene-an hosi moras dengue, tanba daudaun ne’e dadus nasionál hosi saúde públika liuhosi Departamentu Vijilánsia Epidemiolojia iha Ministériu Saúde (MS), rejista kazu dengue hamutuk 1.316, no hosi númeru ne’e iha labarik na’in-21 mak lakon sira-nia vida.

“Agora ba RAEOA ita rejista tolu ona, ida rekUpera ona, na’in-rua (2) mak sei kontinua baixa hela iha Hospital Referál Oé-Cusse,” nia fó sai

Jornalista         : Abílio Elo Nini
Editór               : Evaristo Soares Martins