MEJD planeia loke eskola iha Badut-Mean
BOBONARO, 07 fevereiru 2022 (TATOLI) – Ministériu Edukasaun, Juventude no Desportu (MEJD) planeia loke Ensinu Bázika Filiál (EBF) foun ida ho tipu konstrusaun emerjénsia iha área Badut-Maen, suku Cowa, postu administrativu Balibo, munisípiu Bobonaro.
Diretór Servisu Edukasaun Munisípiu Bobonaro, Crispim Lopes Monis, informa, planu governu atu harii eskola foun ne’e, bazea ba rekomendasaun hosi komunidade sira, durante halo diálogu ho Prezidente Repúblika iha tinan kotuk.
Ministru Edukasaun, Juventude no Desportu, Armindo Maia, orienta ona servisu edukasaun Bobonaro, ba halo levantamentu dadus iha terrenu.
Hosi prosesu rekolamentu ne’e hatudu katak labarik sira iha área ne’e hamutuk na’in-105, maibé hosi númeru ne’e na’in-32 mak foin eskola iha Batugade, Palaka no restante to’o agora sei kontinua halimar de’it iha uma tanba atu asesu ba eskola la’o-ain ho distánsia kilómetru sia.
“Tanba ne’e relatoriu hato’o ba ona, depois ami hetan ona informasaun hosi nasíonal katak iha tinan ne’e, sei fó apoiu matéria konstrusaun emerjénsia ninian hanesan kalen, ai ho pregu, nune’e servisu edukasaun Bobonaro bele konstrui ona eskola refere,” nia informa ba Agência TATOLI iha Jináziu Maliana, segunda ne’e.
Implementasaun konstrusaun harii eskola ne’e, MEJD apoia de’it materiál konstrusaun maibé sei orienta servisu edukasaun Bobonaro mak halo koordenasaun servisu ho autoridade lokál no komunidade sira.
Jornalista : Sérgio da Cruz
Editór : Evaristo Soares Martins
