iklan

EKONOMIA, HEADLINE

Perfurasaun iha posu Buffalo termina tanba laiha mina

Perfurasaun iha posu Buffalo termina tanba laiha mina

Prezidente ANPM, Florentino Mateus Soares Ferreira. Imajen TATOLI/Francisco Sony

DILI, 07 fevereiru 2022 (TATOLI)—Prezidente Autoridade Nasionál Petróleu no Minerál (ANPM), Florentino Soares Ferreira, informa, perfurasaun mina iha posu Buffalo laiha rezultadu, tanba ne’e empreza CARNARVON hapara ona atividade.

“Posu Buffalo-10 nian laiha mina, perfurasaun ramata ona, iha indústria petrolífera mak nune’e ona, maibé empreza mak lakon,” Prezidente ANPM informa ba Agência TATOLI, via online, segunda ne’e.

Notísia relevante: Empreza CARNARVON hahú perfurasaun posu Buffalo iha fulan ne’e

Antes ne’e, Timor-Leste no Austrália diskute atu lori kampu ne’e tama ba jurizdisaun Timor-Leste iha negosiasaun Fronteira Marítima.

“Maibé afinál ita lori kampu ida ne’ebé laiha mina. Iha industria petrolífera mak nune’e ona, iha risku hetan ou la hetan, maibé Graças à Deus iha fim tinan 2020 to’o agora ita hetan kuaze millaun $700 liuhusi kampu Bayu-undan,” nia akresenta.

Empreza Santos Limited halo investimentu pur volta millaun $235 hodi halo perfurasaun iha posu tolu iha kampu Bayu-undan.

“Perfurasaun posu tolu susesu hotu, ita garante katak to’o tinan ne’e ramata ita bele hetan liu biliaun $1. Iha indústria mina mak nune’e, balun hetan balun la hetan. Uluk, molok halo perfurasaun posu tolu iha Bayu-undan ita hetan de’it millaun $100,” nia informa.

Notísia relevante: ANPM akompaña Santos fura posu dahuluk iha kampu Bayu-undan

Iha loron 22 dezembru 2021, Governu liuhosi Ministériu Petróleu no Minerál (MPM) akompaña ho ANPM no empreza CARNARVON Petróleu Timor Unip Lda, halo lansamentu ba perfurasaun mina-matan tasi-laran iha posu Buffalo.

Orsamentu estimativa ba perfurasaun iha posu Buffalo ne’e ho kustu millaun $35, ho durasaun serbisu loron-35, nune’e molok ramata janeiru 2022 bele hetan ona rezultadu.

Antes realiza inisiativa ne’e, empreza hamutuk ho entidade hosi parte Governu hahú ona estudu ba kampu ne’e atu garante sei hetan rezultadu di’ak.

Kampu Buffalo iha tinan-1999 konsege halo ona produsaun millaun 20/baril, maibé tanba presu mina monu iha tinan-2003 to’o 2004, maka kampu ne’e taka.

Empreza CARNARVON sosa kampu Buffalo hosi empreza seluk iha tinan-2016, hafoin hetan notifikasaun hosi Governu Timor-Leste bainhira konklui ona tratadu Fronteira Marítima, ne’ebé tuir loloos kuandu fronteira laiha, mudansa kampu ne’e Austrália nian, maibé tanba liña fronteira iha mudansa maka kampu ne’e pertense ba Timor-Leste 100%.

Jornalista : Antónia Gusmão

Editora      : Julia Chatarina

iklan
iklan

Leave a Reply

iklan
error: Content is protected !!