BAUCAU, 08 fevereiru 2022 (TATOLI) – Servisu Saúde Munisípiu Baucau kontinua esforsu kombate moras dengue iha munisípiu refere.
Diretór Serivisu Munisípiu Saúde Baucau, Domingos Reinaldo da Costa Guterres, husu komunidade sira tenke hamutuk organiza limpeza jerál, kuandu toba presiza uza muskiteiru, hamoos fatin bainhira bee nalihun ba.
“Esforsu sira-ne’ebé mak halo mak agora daudaun ita halo hela promosaun ba komunidade kuaze loron-loron hanesan tama sai uma halo aviza iha suku, aldeia inklui postu admistrativu hotu,” Diretór Saúde Baucau hateten iha ninia knár fatin Villa antiga, tersa ne’e.
Área risku ne’ebé parte saúde deteta iha postu administrativu neen hanesan Baguia, Quelicai, Laga, Vemase, Venilale no aas-liu iha Baucau vila nune’e bainhira deteta ona pesóal saúde direitamente ba kedas área detetadu atu halo kombate hanesan fomigasaun ba uma ne’ebé afetadu inklui viziñu sira-ne’ebé hela besik metru 200.
“Durante ne’e ita rega iha Baucau vila hahú hosi suku Bucoli, Triloka, Bahu, Caibada, Uailili, Gariuai no Venilale,” Domingos akresenta.
Kona-ba fasilidade bainhira iha pasiente ne’ebé kategoria grave sei transporta ba Hospital Rejional Eduardo Ximenes (HoReX), enkuantu ema-ne’ebé kmaan sei halo tratamentu de’it iha sentru saúde ne’ebé besik.
Tuir dadus hosi servisu saúde Baucau totál pasiente dengue bazea ba idade no sexu iha Baucau hamutuk na’in-78 kompostu mane na’in-40 no feto na’in-38. Ne’e hahú hosi idade menus hosi tinan 1 hamutuk na’in-4, tinan 1-5 hamutuk 32.
Nune’e mós tinan 6-10 hamutuk na’in-14, tinan 10-20 hamutuk na’in-12, tinan 21-30 na’in-ualu, 31-40 na’in-ida, idade 51-60 na’in-ida no idade mais 60 hamutuk na’in-rua.
Hosi na’in-78 ne’e, dadaun ne’e hala’o tratamentu iha fasilidade saúde hanesan sentru saúde Bucoli na’in-neen, Uailili na’in-sia, vemasse nain-ida, Venilale na’in-lima no HoReX hamutuk na’in-57.
Jornalista : Natalino Belo
Editór : Evaristo Soares Martins
