OÉ-CUSSE, 08 fevereiru 2022 (TATOLI) – Diretora Sekretariadu Téknika Administrasaun Eleitorál (STAE) iha Rejiaun Administrativa Espesiál Oé-Cusse Ambeno (RAEOA), Luiza da Costa, fó-sai katak, sentru votasaun sira-ne’ebé identifikadu ona ba eleisaun prezidensiál balun seidauk asesu liña eletrisidade.
Diretora ne’e informa, iha fulan-janieru ekipa hosi STAE no CNE hamutuk ho autoridade komunitáriu iha suku tún ba iha baze hodi halo identifikasaun ba sentru votasaun iha suku-18, ne’ebé sentru votasaun estabelese ona hamutuk 60 no estasaun votasaun 88.
Iha-ne’ebá ekipa sira identifika kona-ba kondisaun estrada, liña eletrisidade, liña telekomunikasaun no mobiliáriu hanesan meja no kadeira, nune’e bele prepara molok tama ba loron eleisaun.
“Maibé iha-ne’ebá sentru votasaun balu kuaze 20 hanesan ne’e mak seidauk asesu liña eletrisidade, maioria asesu ona maibé presiza de’it materiál hanesan fiu, ampolas no tomada, kona-ba estrada laiha problema kuandu tempu udan sei difikulta, ba mobiliáriu iha eskola lima (5) maka laiha meja kadeira atu uza iha sentru votasaun, liña telekomunikasaun iha sede aldeia Manan, suku Bene-Ufe la asesu dezde uluk to’o agora,” Luiza da Costa, informa ba Agência Tatoli iha Palaban, Oé-Cusse, tersa ne’e.
Nia hatutan, problema ne’e parte STAE hato’o tiha ona iha autoridade RAEOA liuhosi enkontru preparasaun ho Prezidente Autoridade RAEOA ho Diresaun Rejionál Infraestrutura, nune’e bele buka solusaun.
“Ami hato’o tiha ona, no iha ona konkordánsia no konsege hetan duni nia rezultadu katak iha fevereiru ne’e, ami sei tún ekipa ida hamutuk ho autoridade atu rezolve problema ne’e, nune’e to’o loron eleisaun labele difikulta servisu órgaun eleitorál sira iha baze,” nia katak.
Purtantu, kona-ba númeru eleitór, rezultadu finál seidauk públika tanba iha inísiu fevereiru ne’e to’o 08 fevereiru ne’e, sei hala’o hela verifikasaun lista eksibuisaun mudansa, entaun nia rezultadu númeru eleitór seidauk públika.
Maibé tuir dadús provziória ne’ebé STAE Rejiaun Administrativa Espesiál Oé-Cusse Ambeno rejista hamutuk 50.293 komposta hosi mane 25.655 no feto 24.638, no sentru votasaun 60, estasaun votasaun hamutuk 88.
Notisia relevante: STAE RAEOA prepara brigadista na’in-60 destaka iha sentru votasaun
Jornalista : Abílio Elo Nini
Editór : Evaristo Soares Martins
