OÉ-CUSSE, 09 fevereiru 2022 (TATOLI) – Sekretariadu Tékniku Administrasaun Eleitorál (STAE) no Komisaun Nasionál Eleisaun (CNE, sigla portugés), hamutuk autoridade Rejiaun Administrativa Espesiál Oé-Cusse Ambeno (RAEOA), sei realiza serimónia kulturál iha Lifau molok realiza kampaña eleisaun prezidensiál iha loron 2 marsu.
Kampaña eleisaun prezidensiál períodu 2022-2027 sei hahú hosi loron 2 marsu no termina iha loron 15 marsu no loron eleisaun sei realiza iha 19 marsu.
Objetivu hosi seremónia kulturál iha Lifau ne’e, atu husu matan malirin ba lulik no bei-ala sira atu fó matak malirin ba povu Timor-Leste, liu-liu iha Oé-Cusse atu festa demokrasia ne’e bele la’o ho hakmatek, pás no estabilidade.
Vise-Prezidente CNE Nasionál, Domingos Barreto, informa, atu evita impedimentu krime eleitorál no krime seluk, ne’ebé previstu iha lei kódigu penál Timor-Leste artigu 229 to’o 243, presiza fó onra ba lulik no bei-ala sira nune’e bele fó domin, pás iha ámbitu selebrasaun festa demokrasia ba eleisaun prezidensiál períodu 2022-2027.
“Ohin, ita ko’alia kona-ba preparasaun paktu unidade nasionál ne’ebé ita sei halo hamutuk ho lia-na’in sira iha Lifau iha loron 23 fevereiru ne’e, nune’e ita husu matak malirin antes tama loron kampaña ba eleisaun nian iha 02 marsu ne’e,” Vise Prezidente CNE nasionál, Domingos Bareto, informa ba Agência Tatoli iha salaun igreja Numbei, kuarta ne’e.
CNE ho STAE prepara ona atu konvida lia-na’in sira hosi suku 18, nune’e ko’alia hanesan preparasaun planu nune’e to’o iha tempu kampaña, eleisaun to’o kontajen votasaun komunidade hotu hamutuk, katak fó juramentu iha kultura ne’e, ninia efeitu konsekuénsia boot.
“Tanba orgaun eleitorál hala’o ona enkontru ho PNTL autoridade RAEOA kona-ba paktu unidade nasionál ne’e, importante atu husu matak malirin ba ita nia lulik no bei-ala sira nune’e ita-nia festa demokrasia ne’e bele la’o ho hakmatek pas no estabilidade iha rejiaun ne’e,” nia fó-sai.
Sekretáriu Rejionál ba Asuntu Administrasaun Estatál, Martinho Abani Elo, informa, objetivu hosi serimónia kulturál ne’e sei konvida lidér partidu polítiku sira hotu inklui autoridade komunitária hanesan juramentu molok tama ba kampaña ba eleisaun prezidensiál.
“Ita halo ona konkordánsia ho órgaun eleitorál atu halo paktu unidade nasionál ne’ebé ita sei konvida lider partidu polítiku sira, liuliu ekipa kandidatu prezidente nian, nai xefe suku sira ho lia-na’in mai hosi suku 18, jestór, atu hamosu serimónia kulturál, nune’e husu matak malirin atu kampaña to’o eleisaun ita hadook-aan hosi violénsia no tentasaun sira,” nia katak.
Jornalista : Abílio Elo Nini
Editór : Evaristo Soares Martins
