OÉ-CUSSE, 09 fevereiru 2022 (TATOLI) – Ekipa hosi Programa Nasionál Dezenvolvimentu Suku (PNDS), daudaun ne’e hala’o identifikasaun ba projetu Uma Kbiit Laek faze daruak iha Rejiaun Administrativa Espesiál Oé-Cusse Ambeno (RAEOA).
“Planu ne’e estratéjia hosi Governu liuhosi Ministériu Administrasaun Estatal, aloka uma ba kbiit laek iha RAEOA hamutuk unidade-168, ida-ne’e alista kedas kada suku hetan uma sia (9), balu 10, balu 12, ida tuir métodu ne’ebé maka hosi nasionál, tán ne’e mak ami hahú halo sensibilizasaun iha suku sira depois kontinua halo identifikasaun ba benefisiáriu,” Diretór PNDS RAEOA, Sebastião Tanesi, informa ba Agência Tatoli iha Palaban, Oé-Cusse, kuarta ne’e.
PNDS rejionál daudaun ne’e hala’o hela sensibilizasaun ho matadalan PNDS ho Uma Kbiit Laek (UKL), Reabilitasaun Sede Suku (RSS) no bee-moos.
“Lista benefisiáriu atu hetan projetu ne’e, propoin hosi autoridade komunitáriu sira iha suku ne’ebé identifika ona, nune’e ekipa verifikadór sira tún verifika tuir kondisaun uma ba kbiit laek ne’ebé merese atu hetan ka lae, tanba iha faze daruak ne’e prioridade liu ba inan feto faluk sira, tanba tuir dadús iha 50% mak moris iha Oé-Cusse,” nia fó-sai.
Sensibilizasaun ne’e PNDS fahe ba ekipa haat, ekipa ida iha sub-rejiaun Oésilo no Pássabe, ekipa ida iha sub-rejiaun Nítibe, ekipa rua (2) iha sub-rejiaun Pante Makasar, ho rezultadu privizóriu ba sensibilizasaun ne’e iha suku 10 ona maibé dadús balu seidauk kompleta, hela suku ualu (8) mak seidauk halo sensibilizasaun tanba kondisaun udan, maibé iha fulan abríl tinan ne’e bele halo ona lansamentu.
Antes ne’e Ministru Administrasaun Estatál (MAE), Miguel Pereira de Carvalho, hateten, iha tinan fiskál 2021 katak konstrui Uma Kbiit Laek (UKL) hamutuk 1.254, ne’ebé nia progresu iha munisípiu hotu la’o di’ak no hetan apresiasaun boot hosi komunidade ne’ebé hetan benefisiáriu direita.
Nune’e iha tinan fiskál 2022 ne’e, Governu liuhosi Ministériu Finansa aloka orsamentu besik millaun $8 hosi Orsamentu Jerál Estadu (OJE) 2022, atu kontinua programa UKL hodi harii tán Uma Kbiit Laek hamutuk unidade 4.000 iha teritóriu nasionál.
Tanba ne’e iha 09 dezembru 2021, Parlamentu Nasionál propoin-tán osan hamutuk millaun $63,6000.000 atubele implementa Uma Kbiit Laek iha 2022, aumenta uma 10 kada suku.
Jornalista : Abílio Elo Nini
Editór : Evaristo Soares Martins
