CNE Baucau preparadu superviziona eleisaun prezidensiál
BAUCAU, 10 fevereiru 2022 (TATOLI) – Komisaun Nasionál Eleisaun (CNE, sigla portugés) munisípiu Baucau kontinua hala’o preparasaun hasoru eleisaun prezidensiál liuhosi edukasaun sívika ba eleitór sira no formasaun ba ofisiál supervizaun sira.
Diretór CNE Baucau, Esmeraldo Damião Belo, hateten, atividade seluk mak kolabora ho Sekretariadu Tékniku Administrasaun Eleitorál hodi kontinua hala’o resensiamentu eleitorál iha postu administrativu neen bazea ba rekomendasaun hosi komunidade sira.
Kolaborasaun entre CNE no STAE Baucau hala’o tanba komunidade balun seidauk muda diresaun ka hela fatin iha kartaun eleitóral inklui kartaun balun lakon ka estragu.
“Ita kontinua halo preparasaun ba eleisaun prezidensiál, ita hotu hakarak atu garante eleisaun ne’e la’o di’ak entaun tenke kria pás no estabilidade,” Diretór CNE informa ba Agência Tatoli iha ninia kna’ar-fatin, Vila Nova, kuarta ne’e.
CNE Baucau rekruta ona ofisiál supervizaun ba eleisaun prezidensiál hamutuk na’in-151 ne’ebé tuir planu sei superviziona eleisaun. Supervizór hirak-ne’e remata ona tuir formasaun hanesan prosesu eleisaun, kontajen votu inklui supervizaun nune’e hein atu dezloka ba postu administrativu sira bainhira realiza eleisaun tuir área ka sentru votasaun sira.
Tuir planu ofisiál supervizaun sira-ne’ebé rekruta sei dezloka ba sentru votasaun hamutuk 150 no estasaun votasaun 125 iha munisípiu Baucau.
Kona-ba programa edukasaun sívika, CNE hahú iha postu administrativu Vemasse, Venilale, Laga, Quelicai no sei kontinua iha Baguia ho objetivu atu hasa’e konsiénsia eleitór sira liuliu minimiza erru durante votasaun.
“Matéria edukasaun sívika mak fahe lala’ok prosesu eleisaun nian ba komunidade sira atubele ezerse sira-nia direitu iha eleisaun prezidensiál,” Esmeraldo akresenta.
CNE Baucau planu iha tempu besik sei realiza paktu unidade nasionál molok hahú kampaña eleisaun prezidensiál ho objetivu atu hametin unidade, pás no estabilidade iha munisípiu Baucau.
Jornalista : Natalino Belo
Editór : Evaristo Soares Martins
