iklan

BOBONARO, COVID-19, HEADLINE, MUNISÍPIU

Estudante ISC na’in-37 pozitivu Covid-19 iha Maliana

Estudante ISC na’in-37 pozitivu Covid-19 iha Maliana

Diretór servisu saúde munisípiu Bobonaro, João Barreto Cardoso. Imajen Tatoli/Sérgio da Cruz.

BOBONARO, 11 fevereiru 2022 (TATOLI) – Diretór servisu saúde munisípiu Bobonaro, Joao Barreto Cardoso, fó-sai katak estudante hosi Institutu Superiór Cristal (ICS) na’in-37 ne’ebé hala’o estájiu profisionál iha Hospital Referál Maliana (HRM) konfirmadu pozitivu Covid-19.

“Ita foti amostra horisehik no horbainrua ba na’in-75 no hosi númeru ne’e rezultadu sai horikalan na’in-37 mak pozitivu, maioria estrudante Cristal, grupu ida-ne’ebé halo estájiu profisionál iha ospitál,” nia informa ba jornalista sira, iha izolamentu ospitál tuan Maliana, sesta ne’e.

Nia haktuir, totál estudante ne’ebé halo estájiu profisionál iha Hospitál Referál Maliana hamutuk na’in 80-resin, tanba ne’e ekipa vijilánsia sentinela HRM sei kontinua halo restreiu atubele deteta estudante sira seluk nia kondisaun, hodi hala’o prevensaun atu virus ne’e labele transmite ba ema seluk.

Responsável servisu saúde munisípiu ne’e afirma, daudaun ne’e ekipa vijilánsia Covid-19 munisípiu Bobonaro, prepara hela fatin, atu izola estudante hirak-ne’e iha sala izolamentu iha Hospital tuan, suku Holsa, postu administrativu Maliana, tanba fatin retensaun temporária iha sala ICU iha HRM la sufisiente.

“Ita sei iha hela pasiente pozitivu na’in-haat, ida iha Batugade, na’in-rua inan isin-rua no ida pasiente dengue ita izola hela iha sala ICU ospitál, tanba fatin la to’o ita tenke lori sira pozitivu foun sira-ne’e mai iha izolamentu foun, entaun agora ita iha kazu ativu hamutuk 41 ona,” nia esplika

Entretantu estudante na’in-hitu no médiku na’in-rua ne’ebé pozitivu iha semana liu ba rekupera ona no horisehik alta ona hosi sala izolamentu Hospital Referal Maliana hodi halo atividade hanesan bainbain.

Diretór ne’e nafatin apela ba komunidade sira iha munisípiu Bobonaro, atu nafatin prátika maneira prevensaun sira-ne’ebé Organizasaun Mundiál Saúde (OMS) fo-sai katak, uza máskara beibeik, fase-liman ho sabaun no prátika distansiamentu sosiál.

“Agora ita iha ona transmisaun komunitária, tanba ne’e ita-nia ekipa agora tenta halo fali sensibilizasaun kona-ba maneira prevensaun sira tanba agora ita dadus vasinasaun seidauk to’o 80%,” nia katak.

Fasilidade Covid-19 ne’ebé Governu no parseiru internasionál sira konstrui iha tinan kotuk atu atende ba pasiente sira mak hanesan, kuarentena iha pontu entrada fornteira Mota-ain, suku Batugade, postu administrativu Balibo, sala ICU Hospital Referál Maliana, izolamentu ida inklui laboratóriu Covid-19 no sala izolamentu ida iha Hospital tuan, suku Holsa, Maliana.

Jornalista         : Sérgio da Cruz

Editór               : Evaristo Soares Martins

iklan
iklan

Leave a Reply

iklan
error: Content is protected !!