DILI, 12 fevereiru 2022 (TATOLI)–Estadu Unidu Amérika (EUA) liuhosi fasilidade COVAX, sábadu ne’e, fornese vasina Pfizer BioNTech hamutuk doze 100.620 ba Timor-Leste hodi hasa’e imunidade ba ema ne’ebé simu hodi kombate COVID-19.
Karga ne’e tula ho aviaun TRI MG Asia Airline, ne’ebé to’o iha Aeroportu Internasionál Prezidente Nicolau Lobato, Comoro, iha tuku 14:00 no simu direta hosi ekipa Servisu Autónomu Medikamentu no Ekipamentu Saúde (SAMES).
Diretór Aprovizionamemtu SAMES, Nelson da Costa Correia, hateten, Governu liuhosi SAMES prepara ona kondisaun hodi rai vasina ne’e.
“Durante ne’e preparasaun la’o di’ak, liu-liu oinsá rai vasina sira ne’e, tanba ita hamutuk ho UNICEF investe osan hodi hola jelera hodi rai didi’ak. Oras ne’e ita instala hotu ona iha SAMES no espasu sufisiente,” Diretór informa iha Aeroportu Comoro.
Notísia relevante: Governu hahú implementa vasina doze datoluk ba liña frente
Nune’e, semana oin parte SAMES sei distribui iha munisípiu Baucau, Bobonaro no Ainaro.
Iha fatin hanesan, Enkaregadu Negósiu Embaixada EUA iha Timor-Leste, Tom Daley, hateten, Amérika sei hamriik hamutuk ho Timor-Leste hanesan amigu no parseiru di’ak kombate COVID-19.
“Kontribuisaun ohin loron refleta ba ami-nia kompromisu atu apoia Governu nia esforsu atu salva moris iha Timor-Leste. Ami orgullu atu disponibiliza vasina to’o pandemia ne’e nia rohan no rekupera fali ekonomia,” afirma Enkaregadu EUA.
EUA to’o agora apoia ona Timor-Leste vasina Pfizer hamutuk doze 201.240 liuhosi fasilidade COVAX.
To’o loron 11 fevereiru, rejista vasina doze dahuluk nível nasionál atinje ona 71,9%, doze daruak 80,6% no doze Booster 1%.
Governu hahú implementa vasina Booster iha Timor-Leste iha loron 04 janeiru 2022, ne’ebé hahú ho liña frente, ema vulnerável ba moras króniku no idozu, maibé daudaun disponível ona imunizasaun doze datoluk ne’e ba públiku tomak.
Jornalista : Natalino Costa
Editora : Julia Chatarina
