DILI, 14 fevereiru 2022 (TATOLI)–Konsellu Administrasaun Autoridade Portuáriu Timor-Leste (APORTIL) sei halo konsultasaun uluk ho parte legál hodi haree baze legál molok prosesa pagamentu ba ró-ahi Tranship II.
“Konsellu Administrasaun daudaun diskute hela prosesu pagamentu, kuandu iha ona solusaun ami sei fó sai, ami sei la taka informasaun maibé atu dehan katak ami halo serbisu tuir lei. Lei fó dalan ami halo pagamentu, maibé la fó dalan mós sei labele maibé sei konsulta ho ha’u-niaparte legál sira,” Prezidente Konsellu Administrasaun APORTIL, Lamartino de Oliveira, informa ba Agência TATOLI, iha ninia knaar fatin, Portu Dili, segunda ne’e.
Aleinde ne’e, tanba foin simu knaar iha loron 25 janeiru 2021, maka Prezidente APORTIL sei halibur uluk informasaun.
“Prosesu ida-ne’e ha’u seidauk simu, buat ida dehan memória institusionál, Prezidente sesante la fó hela dokumentu ruma ligadu ho prosesu pagamentu ba ró ne’e, maibé tanba ha’u asume knaar ne’e hodi serví povu no Estadu, entaun ha’u sei hamutuk ho estrutura sira hodi haree asuntu ne’e ba interese nasionál,” nia akresenta.
Notísia relevante: CAC iha faze analiza pedidu APORTIL ba pagamentu ró Tranship II
Antes ne’e, Governu kontrata ró-ahi KMP Tranship II hodi fasilita movimentu via marítima tanba ró-ahi Success sei ba halo manutensaun no renova dokumentu lisensa, enkuantu ró-ahi Berlin Nakroma avaria desde tinan 2020.
Ró-ahi KMP Tranship II hosi Surabaya, Indonézia to’o iha Dili no atraka iha portu Dili iha loron 25 maiu, maibé daudaun ne’e ró ne’ fila ona ba Indonézia.
Kontratu ho empreza estranjeiru ne’e, kada fulan $220.000, ho ninia kapasidade tula pasajeiru hamutuk na’in-300 inklui sasán ho kapasidade tonelada 1.000-resin.
Governu liuhosi Ministériu Transporte no Komunikasaun (MTK) halo kontratu ho empreza hosi Indónezia hodi bele opera ró-ahi ne’e iha Timor-Leste, ne’ebé operasaun semana ida dala-ida, iha segunda ho distinasaun Oé-cusse-Dili-Ataúro no Dili-Oé-cusse-Ataúro.
Iha loron 04 juñu 2021, ekipa Komisaun Antí-Korrupsaun (CAC, sigla portugés) akompaña hosi Diresaun Nasionál Transporte Marítima (DNTM) halo ona investigasaun ba ró-hi KMP Tranship II tanba mosu preokupasaun hosi Parlamentu Nasionál no publiku relasiona kontratu ró foun, karik mosu indísiu krime.
Iha atividade inspesaun deteta katak mosu irregularidade iha prosesu aprovizionamentu.
Aleinde ne’e, rezultadu inspesaun MTK antes ne’e kontráriu ho CAC, ne’ebé orgaun independente ne’e lori ona dadus hodi kruza verbalmente ho Dirijente DNTM no rekomenda halo komparasaun no re-inspesaun fali tuir dadus hosi komisaun.
Maski CAC estuda no kruza informasaun sira, maibé nota katak hafoin lori ro-ahi Tranship II mai Timór mak foin selebra kontratu no halo kontratu mak foin orienta halo prosesu aprovizionamentu.
APORTIL haruka ona pedidu mai CAC hodi halo andamentu administrativa balun ne´ebé presiza asegura, nune´e bele realiza pagamentu ba kontratu Governu, maibé to’o agora seidauk akontese.
Jornalista : Antónia Gusmão
Editora : Julia Chatarina
