BOBONARO, 14 fevereiru 2022 (TATOLI)- Komisaun Nasionál Eleisaun (CNE, sigla portugés) nasional sei realiza paktu unidade nasionál molok realiza kampaña eleitorál iha 02 marsu tinan 2022.
Vise-Prezidente CNE, Domingos Barreto, hateten, atividade ne’e sei envolve lian-na’in sira hosi munisípiu 12 no Rejiaun administrativa Espesiál Oe-cuse (RAEOA) atu hamulak tuir lisan no tradisaun Timor nian nune’e eleisaun prezidensiál bele realiza iha situasaun pás no estabilidade.
“Antes kampaña órgaun administrasaun eleitorál sira sei halo paktu unidade nasionál, ita sei halo iha nível munisípiu depois hodi hotu lia-na’in sira ba konsentra hotu iha Dili, iha loron 28 mak kandidatu sira sei asina sira-nia juramentu,” nia informa ba jornalista sira iha salaun PDHJ, Maliana, segunda ne’e.
Domingos fó-sai katak, hafoin ida-ne’e órgaun eleitorál sira prepara atu realiza debate públiku entre kandidatu admitidu sira iha CNE nasionál.
Jornalista : Sérgio da Cruz
Editór : Evaristo Soares Martins
