DILI, 14 fevereiru 2022 (TATOLI)—Deputada Maria Anabela Savio hateten relatóriu fiskalizasaun komisaun E trata asuntu infraestrutura ne’ebé hala’o iha loron 07-08 outubru 2021, relata katak IGE, I.P presiza halo normalizasaun sedimentasaun mota klise Maria no mota sira seluk iha postu administrativu Maubara, munisípiu Liquiça.
“Rekomenda ba iha parte Institutu Jestaun Ekipamentu (IGE, sigla portugés)) atu bele ba normaliza tiha sedimentasaun iha mota Klise Maria no mota sira seluk iha munisípiu Liquiça bazea ba pedidu hosi Obras Públika Munisípiu Liquiça,” Deputada Maria Anabela, lee sai relatóriu komisaun E iha plenária Parlamentu Nasionál, segunda ne’e.
Tuir relatóriu fiskalizasaun komisaun E ne’ebé Agéncia Tatoli asesu, ponte klise Maria lokaliza iha postu administrativu Maubara, kondisaun ponte refere di’ak hela maibé iha ponte okos nakonu ho raihenek (sedimentasaun).
Iha fiskalizasaun ida-ne’e komisaun nota katak kondisaun ponte iha risku nia laran bainhira iha tempu udan boot tamba agora dadaun raihenek nakonu iha ponte okos no taka dalan ba bee-mota hodi sulin liu.
Se laiha normalizasaun urjente ba sedimentasaun iha área refere, tuir nia, iha tempu udan bee-mota sei estraga ponte no volume bee-mota boot estraga komunidade nia uma ne’ebe besik iha mota.
Hafoin halo observasaun komisaun E deskobre, diferensia elevasaun laloran tasi ho ponte maizamenus metru ida ho balun haree ba distánsia hosi tasi ibun ba ponte no elevasaun laloran tasi sei fó perigu mós ba estrada ligasaun munisípiu Liquiça ba munisipiu Bobonaro.
Iha biban ne’e, resposavel Obras Púlika Munisípiu Liquiça relata ba reprezentante povu sira durante fiskalizasaun, katak hosi sira-nia parte hatama tiha ona pedidu ba iha IGE, I.P hodi bele normaliza tiha sedimentasaun ba mota sira ne’ebe sei fó risku iha tempu udan tuir mai maibé to’o agora seidauk hetan atendimentu hosi parte IGE, I.P
Liga ba elevasaun laloran tasi nian hosi IGE, I.P normaliza sedimentasaun iha mota laran automatikamente laloran tasi sei baku tama to’o área mota no sei fó risku mós ba estrutura ponte. Husi observasaun ida ne’e komisaun E fó hanoin ba iha Obras Púlblika munisipiu Liquiça atu halo estudu prepara dadus no dezeñu foun atu nune’e bele halo fali ponte foun.
Presiza moru protesaun mota Morae
Iha vizita komisaun nian ba ponte Mota Morae, Maubara, tuir relatóriu hosi akontesimentu kalamidade iha loron O4 abril 2021 liu-ba konsege rezulta komunidade iha suku Vaviquinia partensia ba Mota Morae sofre tanba bee husi mota sae hotu ba komunidade nia hela fatin.
Problema hsi akontesimentu ida-ne’e tanba volume bee-mota boot tebes no laiha moru protesaun hodi proteje komunidade nia uma.
“Rekomenda ba Ministériu Obras Públika atu halo moru protesaun iha mota Morae ho tipu Betaun Siklop no distánsia kilómetru ida ho balun atu nune’e bele proteje komnunidade iha tempu udan,” Deputada Anabela hateten
Bazea ba informasaun ne’ebé komisaun E hetan hosi tékniku Obra Públiku no tékniku Ajénsia Dezenvolvimentu Nasionál (ADN) katak, mota Morae nia volume bee barak tanba mota refere mai hosi fatin rua no iha área mota ne’e mós Governu harii tiha ona gabiaun iha mota ninin hodi bele proteje komunidade nia hela fatin maibé realidade bainhira tempu udan boot, bee-mota sempre sobu gabiaun no komunidade nia-uma.
Tan ne’e hosi tékniku sira sujere ba Govemu atu bele halo moru ho tipu betaun siklop ho distánsia kilómetru ida ho balun atu nune’e bele proteje komunidade, se lae kada tinan iha tempu udan komunidade sempre halerik ba bee-mota ne’ebé estraga sira-nia uma.
Prezidente Komisaun E, Abel Pires, hateten relatóriu fiskalizasaun ne’e loloos fó sai iha fulan-outubru maibé momentu ne’ebé hahú tama iha debate Orsamentu Jerál Estadu (OJE) 2022, nune’e labele aprezenta.
Nune’e mós Prezidente Parlamentu Nasionál, Deputadu Aniceto Longuinhos Guterres Lopes, hateten relatóriu komisaun E nian relevante duni dadaun ne’e, nune’e Governu presiza fó atensaun.
Hatán ba preokupasaun sira-ne’e hotu, reprezentante Governu liuhosi Ministru Asuntu Parlamentár no Komunikasaun Sosiál (MAKPOMS), Francisco Martins da Costa Pereira Jéronimo, hateten rejista hela preokupasaun deputadu sira-nian sei enkamina direita ba ministéiru tutela hodi fó resposta no hatene progresu servisu sira to’o iha ne’ebé hodi responde preokupasaun povu nian.
Jornalista: Nelson de Sousa
Editór: Cancio Ximenes
