DILI, 14 fevreiru 2022 (TATOLI)— Ekipa Lafaek la konsege konkista nia vitória iha jogu dahuluk AFF U-23 ne’ebé hala’o iha Kamboja, segunda kalan ne’e, tanba empate ho Filipina 2-2.
Minutu primeiru hahú ekipa rua lansa kedan kontra no atake ba malu tuir tekniku no abilidade ekipa idaidak nia atu buka hatama golu nune’e bele fó vitoria ba sira nia nasaun.
Timor-Leste domina kedan bola iha minutu primeira parte halo Filipina book-an araska, nune’e iha minutu lima (5) defeza Filipina nian halo erru iha liña oin ou grande área Filipina nian, árbitru foti kedan desizaun fó penalidade ba Timor – Leste no oportunidade ne’e ezekuta hosi Mozinho Barreto de Lima (10) bola kona kedan rede Filipina nian muda rezultadu provizóriu ba 1-0.
Golu ne’e halo Timor – Leste nia jogu umenta manas liután nune’e Timor-Leste mak domin liu bola. Maibé situasaun mosu oinseluk tanba derepente bola barullu iha lina oin Timor – Leste nian halo guarda rede Genildo Pereira (1) la antisipa di’ak jogadór Filipina Ivan Ouano (17) lansa kedan golu ida hatur rezultadu ba 1-1. Golu ne’e mak termina jogu primeira parte entre ekipa rua ne’e.
Dolar ba segunda parte ekipa Filipina la nonook de’it konsege halo mudansa ba liña jogadór nian nune’e sira komesa domina bola hodi hamate tutuir Timor-Leste nia, maibé Timor – Leste nafatin halo esforsu nune’e iha minutu 55 Jaimito Soares (24) lansa tan golu ida muda rezultadu ba 2-1.
Maibé, Filipina la nonook de’it tenta hatudu jogu no ambisaun makas. Esforsu hirak ne’e la hela de’it hanesan esforsu konsege hatudu rezultadu tanba iha minutu Ivan Ouano nafatin marka golu ida lori rezultadu ba kedan 2-2 hodi impede Timor -Leste nia vitória no to’o jogu termina rezuladu hela de’it ho empate ekipa rua tenke fahe pontu ida ida ba malu iha grupu A nian.
Jornalista: Hortencio Sanchez
Editór : Florencio Miranda Ximenes
