Sidadaun idade 12 to’o menus 18 simu vasina doze dahuluk na’in-37.509
DILI,15 fevereiru 2022 (TATOLI)— Diretora Servisu Saúde Munisípiu Dili, Agostinha Segurado, hateten to’o oras ne’e labarik idade 12 to’o menus 18 ne’ebé mak simu ona vasina Pfizer doze dahuluk hamutuk 37.509.
“Vasina Pfizer ne’ebé mak ita vasina ba estudante idade 12 menus to’o 18 hahú iha 27 outubru 2021 to’o horisehik iha munisípiu Dili ba doze dahuluk hamutuk 37.909 no doze daruak 30.126,” Diretora ne’e hateten liuhosi konferénsia imprensa iha salaun MSSI-Caicoli, tersa ne’e.
Tuir tarjetu loloos iha munisípiu Dili tenke vasina estudante idade 12 no menus 18 hamutuk rihun 34 no mós iha komunidade ka labarik la eskola tuir estimasaun dadus husi Ministériu Saúde hamutuk rihun 6.
“Labarik hotu ne’ebé mak eskola iha Dili hamutuk 47, ita kuaze fó vasina hotu ona doze dahuluk agora doze daruak mak ita halo ona koordenasaun fali kada eskola sira atu buka tuir labarik sira ne’ebé hetan ona doze dahuluk no mós sira seidauk hetan doze daruak ita-nia ekipa halo hela koordenasaun ho diretór eskola para sira fó autorizasaun ,” Nia dehan.
Iha doze dahuluk no daruak sei iha balansu boot ida atu ekipa saúde tenke halo esforsu lalais tanba labarik lubuk ida mak seidauk vasina doze daruak hamutuk rihun 7.
Entretantu, sidadaun lina frente ne’ebè simu ona simu ona vasina doze datoluk hamutuk rihun 7-resin.
“Ita-nia tarjetu loloos ba liña frente no idade komorbidade 60 ba leten atu simu vasina doze datoluk hamutuk rihun 3, maibé agora daudaun vasina doze datoluk atinje ona rihun 7-resin,” Diretora ne’e akresenta.
Iha biban hanesan, Portavós Komisaun Interminsiteriál ba Implementasaun Vasina COVID-19 iha Timor Leste, Danina Coelho hateten labarik sira idade 12 to’o menus 18 ne’ebé simu ona vasina doze dahuluk hamutuk 37.509 ka 20.6% no doze daruak hamutuk 30.126 ka 16.6% .
Notìsia relevante:COVID-19: kazu detetadu pozitivu 117 no ativu sa’e ba 1.514
Jornalista : Felicidade Ximenes
Editòr : Florencio Miranda Ximenes
