DILI, 17 fevereiru 2022 (TATOLI)–Ministru Koordenadór Asuntu Ekonómiku (MKAE), Joaquim Amaral, kuarta ne’e, hamutuk ho ekipa halo vizita ba instalasaun grupu benefisiáriu tolu, ne’ebé hetan subvensaun ba atividade negósiu hosi setór unidade iha tinan 2021.
“Ita-nia vizita ne’e atu haree benefisiáriu tolu iha Dili ne’ebé simu subvensaun hosi MKAE iha tinan 2021, atu haree progresu atividade ne’ebé sira hala’o hafoin simu subvensaun,” Ministru hateten ba Agência TATOLI, iha instalasaun atividade benefisiáriu Grupu Haslos, Matadouro.
Durante vizita, Ministru hetan akompañamentu hosi Institutu Apoiu Dezenvolvimentu Emprezariál (IADE), ne’ebé iha papél prepara empreza sira halo formasaun kona-ba jestaun negósiu.
Grupu benefisiáriu ne’ebé submete proposta atu hetan subvensaun hamutuk 69 iha tinan 2021, hosi munisípiu 12 la inklui Rejiaun Administrativa Espesiál Oé-cusse Ambeno (RAEOA).
Notísia relevante: IADE-BNCTL Sei Selebra Akordu Fó Kréditu ba Kliente Ne’ebé Tuir Ona Formasaun Emprezariál
Enkuantu, benefisiáriu ba programa ne’e hala’o atividade iha área produtivu sira hanesan pekuária, peska, turizmu komunitáriu inklui formasaun no kapasitasaun.
“Ita-nia vizita ne’e hahú hosi munisípiu Dili ba benefisiáriu tolu hanesan Grupu Ata Fryser Marabia ne’ebé halo produsaun manu, Grupu Sene iha Becora prodús estátua ho produsaun instrústria no ikus Grupu Haslos iha Matadouro halo destilasaun tua,” nia akresenta.
Hosi vizita ne’e, ekipa nota katak benefisiáriu tolu hala’o duni atividade tuir planu negósiu ne’ebé sira aprezenta iha proposta.
“Sira susesu duni tanba rezultadu ne’ebé ita haree di’ak tebes. Hanesan iha vizita ne’e, ita haree Grupu Haslos halo atividade prosesa materiál prima hosi matéria agríkola hanesan hudi, morangu, kafé, kulu-jaka no seluk tan, ne’ebé materiá prima hotu prosesa halo fragmentasaun ba tua manas, ne’ebé marka BARIQUE, ne’ebé ninia prosesu tuir ona indústria nia hakarak,” Ministru dehan.
Haree mós katak grupu tolu ne’e hatudu duni rezultadu pozitivu tanba iha padraun serbisu ba prosesamentu inklui ninia rekezitu hotu, liuliu ba produsaun tua manas ne’e halo ona teste laboratóriu no hetan apresiasaun hosi merkadu.
“Bainhira ba oin mak ita haree produsaun aumenta, ita bele taka tua manas importasaun, tanba tua manas iha Timor-Leste mós iha kualidade, morin no sabor di’ak. Tanba ne’e, hanoin indústria kiik sira hanesan ne’e mak ita presiza kontinua haburas no suporta fazeadamente, nune’e importasaun tua manas ne’e bele redús,” Governante ne’e tenik.
Hosi vizita ne’e, ekipa atu kria kontinuasaun serbisu hamutuk, nune’e bele hadi’a planu estratejia bainhira hili benefisiáriu iha tinan 2022.
Subvensaun $450.000 ba grupu hamutuk 69
MKAE nia pedidu orsamentu tinan fiskal 2021 atu oferese subvensaun ba setór privadu ne’e hamutuk $450.000 ba grupu hamutuk 69, maibé ikus mai konsege ezekuta $407.000, ne’ebé kuaze 2% mak fila fali ba kofre Estadu.
“Subvensaun ba grupu halo detilasaun tua ho pedidu $8.000 maibé MKAE haree no halo avaliasaun hatun ba $5.000 resin, hakiak manu $5.000 resin, no artekultura $4.000 resin,” Ministru informa.
Iha fatin hanesan, Adjuntu Diretór Grupu Haslos, Herculano Ivo Lopes Granadeiro, agradese ba Governu liuhosi MAKE, ne’ebé apoiu ona atividade transforma produtu lokál sira halo fragmentasaun sai tua manas.
“Ami kontente tanba ami hato’o proposta ba MKAE hodi apoiu ami ho osan hamutuk $5.360, hodi haforsa ami bele aumenta produtu lokál orgániku hanesan kafé, hudi, baunilla, ainanas no seluk tan hodi halo sai tua manas no ohin bele mai haree nia rezultadu,” nia dehan.
Jornalista : Arminda Fonseca
Editora : Julia Chatarina
