BAUCAU, 18 fevereiru 2022 (TATOLI)- Xefe Estadu Maiór Jeneràl FALENTIL- Forsa Defeza Timor-Leste (F-FDTL), Tenente Jenerál Falur Rate Laek, husu ba membru FALINTIL-Forsa Defeza Timor-Leste (F-FDTL) iha Komponente Terestre Baucau atu kontinua tane aas displina no loyalidade hosi servisu ba institisaun F-FDTL ho di’ak.
“Ha’u husu atu imi kontribui di’ak no hatudu loyalidade ba imi nian Komandante sira no loyalidade ba imi nian Komandante Eskuadra, loyal ba imi nian Komadante Pilotaun, loyal ba imi nia Komandante Kompañia, loyal ba imi Komadante Batalaun no loyal ba imi Estadu Maiór,” Tenente Jenerál ne’e hateten bainhira hala’o vizita ba Komponente Terrestre Baucau, sesta ne’e.
Alende ne’e, Komandante F-FDTL ne’e mós husu ba membru sira atu kontinua hadomi família tanba família moris di’ak mak kontribui ba institusaun nian di’ak.
“Ita bo’ot sira tenke iha espíritu ho domin tanba hadomi imi nian familia, hanesan ita nian Xefe Estadu Maiór Jenerál, Tenente Jenerál Reformadu Lere Anan Timur ko’alia ita ema moris iha misaun rua ida maka serbí instituisaun no ida seluk maa servisu familia, ha’u husu ita bo’ot sira tenke tau ida ne’e iha ulun hodi dezenvolve imi nia karreira iha instituisaun militár,” Falur Rate Laek sujere.
Nune’e, membru F-FDTL hotu tenke mantein disiplina no atu hatudu ezemplu di’ak ba sosiedade hodi komunidade labele sente tauk ba militár, maibé sente seguru bainhira militár sira nia prejensa.
“Ita tenke mantein disiplina hodi hadomi sosiedade, nune’e forsa sai duni liman kro’at povu nian,” Komandante ne’e fó hanoin.
Iha ámbitu vizita ne’e, Tenente Jenerál ne’e rona preokupasaun Komandante Komponente Terrestre Baucau, Tenente Koronél Infantaria Renilde Guterres Cortereal E. Silva, ne’ebe hato’o mós limitasaun ekipamentu lojístika no matéria inklui kestaun balun ne’ebé mak sira-nia parte hasoru iha tereñu.
Nune’e, Tenente Jenerál dehan nia parte anota ona hodi enkamina ba iha Governu liuhosi Ministériu Defeza hodi buka solusaun ba kestaun ne’e.
“Ha’u hateten ba sira la’os ha’u mai halo aprezentasaun, ha’u la’ós atu mai fó resposta ka fó solusaun ba problema, ha’u mai atu koñese imi, atu hatene situsaun sira ne’e hodi enkamina ba ema polítiku sira hodi tau iha planu asaun atu bele hadia kestaun sira ne’e,’ Nia haktuir.
Entertantu, Tenente Jenerál hahú hala’o nia programa vizita iha kinta (17/2) hodi halo vizita ba Sentru Instrusaun Treinamentu Metinaro.
Notísia relevante: Lere husu membru serbí Estadu no instituisaun F-FDTL ho domin
Jornalista: Natalino Costa
Editór : Florencio Miranda Ximenes
