OÉ-CUSSE, 22 fevereiru 2022 (TATOLI) – Sekretariadu Tékniku Administrasaun Eleitorál (STAE), tersa ne’e kapasita brigadista na’in-60 nu’udar preparasaun atu lidera eleisaun presidensiál períodu 2022-2027 ho edekuada no responsabilidade.
“Ita halo formasaun ba brigadista na’in-60 atu prepara ita-nia rekursu, atu hasoru eleisaun tinan ne’e, nune’e bele aumenta kapasidade iha rekursu ne’ebé di’ak ho kualifikadu no adekuadu atubele organiza eleisaun ne’e ho didi’ak no responsabilidade tuir lei ne’ebé mak haruka,” Xefe Departementu edukasaun eleitorál no formasaun STAE nasionál, Cárceres Ximenes informa ba Agência Tatoli iha salaun Alfándega, Palaban.
Nia fó-sai katak, matéria prinsipál iha formasaun durante loron tolu hahú tersa 22 to’o kinta 24 fevereiru, hanesan brigadista sira responsável másima iha sentru votasaun sira.
Tanba kompeténsia ne’ebé atribui ba brigadista sira bazea ba lei númeru 15/2021, 14 jullu no sesta alterasaun lei númeru 7/2006, 28 dezembru kona-ba Lei Eleitorál Prezidente Repúblika, define kna’ar brigadista sira-nian hodi lidera prosesu tomak iha sentru votasaun.
“Formasaun durante loron tolu ne’e, ita hakarak hanorin sira ho kualidade, atu hatuur imparsialidade, onestidade, nune’e bele garante eleisaun ne’e la’o ho susesu,” nia katak.
Totál sentru votasaun iha RAEOA hamutuk 60 ho estasaun votasaun hamutuk 88, ho totál eleitór hamutuk 51. 495 kompostu hosi feto 25.263 no mane 26.232.
Jornalista : Abílio Elo Nini
Editór : Evaristo Soares Martins
