BOBONARO, 23 fevereiru 2022 (TATOLI) – Munisípiu Bobonaro, kuarta ne’e realiza Paktu Unidade Nasionál, hodi hametin estabilidade iha períodu kampaña eleitorál to’o rezultadu eleisaun prezidensiál.
Diretór CNE Munisípiu Bobonaro, Juvito Ramos, hateten serimónia ne’e realiza kada tinan lima, ho obetivu atu garante eleisaun prezidensiál bele la’o ho ambiente hakmatek, hahú hosi faze kampaña eleitorál to’o anunsia rezultadu finál.
“Paktu unidade ita realiza atu kandidatu sira hotu iha períodu kampaña bele la’o ho pasífiku, laiha problema no violénsia, depois iha loron publikasaun rezultadu eleisaun ne’e hotu-hotu bele simu ho fuan no la hamosu problema,” nia ko’alia iha Maliana.
Serimónia Paktu Unidade Nasionál ne’e hala’o iha Jináziu Maliana ho tema “Ho Kultura ita promove pás no unidade iha eleisaun prezidensiál 2022” ne’ebé organiza hosi Komisaun Nasionál Eleisaun (CNE, sigla portugés) munisípiu Bobonaro.
Lian-na’in hosi suku Mali-Lait, postu administrativu Bobonaro, munisípiu Bobonaro, Moises Leite, fó-sai katak, rezultadu hosi serimónia kulturál buka ka dada fahi no manu aten hatudu sinál eleisaun prezidensiál tinan 2022 sei la kontese tán ba ronde daruak.
“Ha’u haree hosi manu ho fahi atén ne’e eleisaun ronde segundu laiha. Se ronde segundu entaun atén ne’e hakru’uk,” lia-na’in ne’e katak.
Lia-na’in ne’ebé dirije serimómia kulturál ne’e hamutuk na’in-haat, kompostu hosi lian na’in prinsipal na’in-rua hosi suku Tapo-Memo no Lahoema, postu administrativu Maliana.
Lia-na’in ida tán hosi suku Atabae, postu administrativu Atabae, no ida husi suku Mali-lait, postu administrativu Bobonaro, ne’ebe reprezenta lia-na’in sira seluk iha munisípiu ne’e.
Purtantu, ekipa susesu kandidatura José Ramos Horta, Esmeralda de Jesus Pereira, agradese CNE tanba bele organiza ona serimónia paktu ba eleisaun ne’e.
“Ami fiar saida mak lia-na’in sira halo ona, buat ne’ebé sira ko’alia no hameno ami sei la’o-tuir, no prontu koopera ho órgaun eleitorál, autoridade seguransa, atu nune’e ita-nia festa demokrasia ne’e bele la’o ho susesu tuir buat ne’ebé povu Timor-Leste nia hakarak,” nia akresenta.
Jornalista : Sérgio da Cruz
Editór :Evaristo Soares Martins
