iklan

BOBONARO, COVID-19, HEADLINE, IMAJEN, MUNISÍPIU, SAÚDE

Feto ida mate ho COVID-19 iha Maliana

Feto ida mate ho COVID-19 iha Maliana

Pasoál saúde sira tula hela mate-isin hodi entrega ba família iha Maliana. Imajen Tatoli/Sergio da Cruz.

BOBONARO, 23 fevereiru 2022 (TATOLI) – Feto ida ho idade tinan 50 mate ho COVID-19 iha sala Intensive Care Unit (ICU) izolamentu Covid-19, Hospital Referál Maliana, munisípiu Bobonaro.

Koordenadór Pilár 7 Covid-19 munisipiu Bobonaro, José Marçal da Cruz, informa, pasiente ho inisiál CDS orijen hosi suku Tapo-Memo, postu administrativu Maliana, halo tratamentu saúde sala emerjénsia iha loron 18 fulan ne’e mai ho moras diabetes ka raan-midar.

Matebian CDS mate ho idade 50 ho estatutu faluk tanba la’en kaben husik ona iha tinan kotuk, no horik hela feto mesak ida ho nia bei-oan na’in-tolu.

Koordenadór Pilár 7 Covid-19 munisípiu Bobonaro, José Marçal da Cruz. Imajen Tatoli/Sergio da Cruz.

“Ami halo teste PCR depois deskobre katak nia mós pozitivu Covid-19 ho CT 17,6, nune’e doutór sira rekomenda mai direitamente baixa iha sala izolamentu depois ohin dadeersan tuku 06.10 pasiente ne’e kondisaun grave tanba nia diabetes ho Covid tán nia husik ona mundu,” nia ko’alia iha Maliana, kuarta ne’e.

Koordenadór ne’e subliña, tuir lei ne’ebe vigora iha Timor-leste, pasiente ne’ebé mate infetadu ho moras Covid-19 tenke halo prosesu funerál tuir protokolu saúde ne’ebé Organizasaun Mundiál Saúde (OMS) hatuur ona.

Tanba ne’e sei koordena  no halo negosiasaun ho parte família atu la’o-tuir regra ne’ebé estabelese ona, hodi evita moras ne’e transmite ba ema seluk.

“Agora daudaun família ho governu prepara hela atu ba halo prosesu funerál, maibé ekipa Covid-19 sei akompaña to’o iha família nia rezidénsia atubele hamutuk halo ita-nia pasiente ne’e ho didi’ak,” nia katak.

Iha parte seluk, Lázaro de Jesus Santos, nu’udar mane foun sente triste tanba lakon banin ida-ne’ebé durante ne’e akompaña sira-nia moris iha situasaun susar no terus nia laran.

Nia fó-sai katak, matebian la sofre moras ruma, maibé iha kinta semana kotuk ne’e mak foin sente me’ar no isin-manas entaun família deside lori ba halo tratatamentu iha sala emerjénsia mak médiku sira foin deteta pasiente ne’e moras diabetes fulan ida-resin ona.

Família matebian, Lázaro de Jesus Santos. Imajen Tatoli/Sergio da Cruz.

“Sira (saúde) dehan ha’u-nia inan ne’e mate ho Covid, ami tenke la’o-tuir regra ne’ebé iha, maibé ha’u hakarak hatete de’it ami-nia inan ne’e la’ós tanba Covid-19 de’it mak mate maibé moras grave liu mak diabetes,” nia esklarese.

Tuir planu, ohin parte saúde munisípiu Bobonaro koordena ho família lori matebian ne’e ba nia  rai moris-fatin iha Muczo, suku Tapo-Taz, postu administrativu Bobonaro hodi hala’o serimónia funerál tuir kultura Bunak, uma-lisan Gipe nian.

Jornalista         : Sérgio da Cruz

Editór               : Evaristo Soares Martins

iklan
iklan

Leave a Reply

iklan
error: Content is protected !!