OÉ-CUSSE, 23 fevereiru 2022 (TATOLI) – Lia-na’in hosi suku 18 iha Rejiaun Administrativa Espesiál Oé-Cusse Ambeno (RAEOA) hamutuk ho Komisaun Nasionál Eleisaun (CNE, sigla portugés), kuarta ne’e realiza seremónia rituál iha fatin sagradu Lifau, husu matak-malirin hodi garante pás no estabilidade iha kampaña eleisaun prezidensiál.
Vise-Prezidente CNE Nasionál, Domingos Barreto, informa, CNE hamutuk ho lia-na’in sira realiza seremónia rituál ne’e ho objetivu atu husu matak-malirin ba lulik no bei-ala sira, tanba iha 2 marsu Timor-Leste hala’o kampaña no eleisaun eleisaun prezidensiál.
“Serimónia rituál ne’ebé halo, parte preparasaun ida hosi CNE, konvida lia-na’in sira atu hamulak tuir ita-nia lisan kultura Timór nian husu matak-malirin ba kandidatu 16 no ba povu Timor-Leste, ne’ebé iha rituál ne’e animál nia atén hatudu sinál pozitivu ba kandidatu sira-ne’ebé sei hala’o kampaña hosi 2 to’o 16 marsu to’o eleisaun iha 19 marsu tinan ne’e,” Vise-Prezidente CNE Nasionál, Domingos Bareto, ba Agência Tatoli iha Oé-Cusse.
Nia informa, serimónia rituál ne’e, hanesan meiu ida atu harohan ba bei-ala no eroi sira, haraik matak-malirin mai komunidade iha territóriu nasionál hanesan mós manifestasaun ida atu hato’o mensajen no rekomendasaun iha RAEOA ba kandidatura ne’ebé konkore iha eleisaun prezidensiál.
Iha biban seremónia ne’e, lia-na’in sira mós apela ba kandidatura prezidente repúblika presiza kria unidade pás no estabilidade ho laran-moos, bainhira eleitu ba xefe estadu ba períodu 2022-2027.
Sekretáriu Rejionál ba Asuntu Administrasaun Estatál, Martinho Abani Elo, reprezenta autoridade RAEOA, apela ba militante no simpatizante kandidatura nian atu hakribi violénsia iha ámbitu kampañia to’o eleisaun, tanba bainhira kandidatu ida hetan vitóriu iha eleisaun ne’e, nu’udar xefe estadu ba povu Timor-Leste.
“Ohin, seremónia ikus, tanba ita hahú hosi fatin sagradu Nunuheno, Tula-Ika ikus iha tugu Lifau, realiza rituál ne’e ejize ba kandidatura sira atu iha obrigasaun hosi obedese regra no prosedimentu legál ne’ebé regulariza iha prosesu kampaña polítika períodu ne’e,” nia katak.
Martinho Abani, mós solisita kandidatura sira atu divulga programa, planu estratéjiku no hasai linguajen no mensajen ba povu kona-ba dezenvolvimentu nasionál, ho interese Estadu nian no labele uza lian provokativu.
Nia afirma, prosesu eleisaun ne’e, livre, justu no pás tuir prinsípiu konstituisaun no lei sira mak kandidatura sira mós tenke fuan boot no ulun-malirin atu simu rezultadu eleisaun nian.
Entretantu, partisipa iha seremónia rituál ne’e, hosi komisariu CNE, autoridade RAEOA, jestór sub-rejiaun haat (4), xefe suku no lia-na’in hosi suku 18, veteranu, lideransa ekipa susesu hosi partidu polítiku, no seguransa PNTL-FDTL.
Jornalista : Abílio Elo Nini
Editór : Evaristo Soares Martins
