DILI, 24 fevereiru 2022 (TATOLI)-–Ministru Koordenadór Asuntu Ekonómiku (MKAE), Joaquim Amaral, kinta ne’e, enserra programa seguransa alimentár, iha postu administrativu Railaco, munisipiu Ermera.
“Objetivu programa ne’e mak sosa produtu lokál hodi distribui ba komunidade kbiit laek sira, maski naton maibé bele hakma’an ona ita-nia komunidade nia sofrementu,” Ministru Joaquim hateten liuhosi nota ne’ebé Agência TATOLI asesu.
Programa seguransa alimentár previstu iha lei númeru 8/2021, 03 maiu, ne’ebé altera lei númeru 14/2020, 29 dezembru, refere ba Orsamentu Jerál Estadu (OJE) 2021 no aprovasaun medida ba apoiu sósiu-ekonómiku, ne’ebé hahú halo lansamentu iha suku Aisirmou, munisípiu Aileu iha loron 21 dezembru 2021 no enserra iha loron 24 fevereiru 2022 iha postu administrativu Railaco.
Notísia relevante: Governu hahú implementa programa seguransa alimentár hosi Aileu
Totál benefisiáriu ba programa ne’ebé implementa hosi Sentru Lojístika Nasionál (CLN, sigla portugués) hamutuk 88.000, kompostu hosi faze dahuluk 32.000 no faze daruak 56.000.
Programa ne’e kuaze hanesan ho programa cesta bázika, maibé item ba produtu sira la barak, hanesan foos rai, batar, koto, fore, no forerai.
Governu prevee orsamentu hamutuk millaun $12 ba CLN atu restoke foos ba armazen nasionál hodi halo intervensaun ba merkadu, nune’e bainhira mosu dezastre naturál, Governu iha kbiit atubele fó asisténsia, enkuantu restante sosa produtu lokál ne’ebé agrikultór sira kuda hodi halo distribuisaun ba sidadaun menus rendimentu.
Nune’e, dekretu-lei ne’e fó atensaun espesiál ba ema no família sira ho rendimentu la liu $1,90 kada loron, ne’ebé atu define sé mak iha direitu ba apoiu espesiál ne’e, entidade responsável sira uza dadus hosi rejistu uma-kain ida-idak iha kada suku hosi Ministériu Administrasaun Estatal (MAE) no Ministériu Solidariedade Sosiál no Inkluzaun (MSSI).
Nune’e, kada benefisiáriu hetan produtu ai-han ho valór $30, ne’ebé rejista-an iha ‘Livru Rejistu Uma-kain’ nu’udar xefe família no bainhira labele simu sei reprezenta hosi membru ida hosi uma-kain ho otas 17 ba leten.
CLN kontrata empreza timor-oan, Branditall, hodi sosa produtu lokál no distribui ba komunidade iha territóriu tomak.
Seremónia enserramentu programa ne’e partisipa hosi Prezidente Autoridade munisípiu Ermera, Eusébio Salsinha, Administradór postu Railaco, Tomas da Costa Soares, Koordenadora Jerál programa seguransa alimentar, Florentina Smith, Prezidente CLN, Jervásio Cardoso de Jesus da Silva, no koordenadora Jerál Gabinete MKAE, Guida Isaura Monteiro, inklui mós Reprezentante Programa Ai-han Mundiál (WFP, sigla inglés).
Jornalista : Arminda Fonseca
Editora : Julia Chatarina
