Derrota iha tiru penaltu, ekipa Timor-Leste falla hakat ba finál AFF
DILI, 24 fevereiru 2022 (TATOLI)— Ekipa Lafaek U-23 falla hakat ba finál The ASEAN Football Federation (AFF) U-23 Championship 2022, tanba derrota ho Vietname iha tiru penalidade, iha Estadiu Techo National Kamboja, kinta (24/02), kalan ne’e.
Maske, ekipa Timor-Leste lakon iha jogu semi finál AFF ne’e, maibé konsege marka istória tanba ho ekipa zigante hanesan Vietname, jogu durante minutu 120 laiha golu.
Notísia relevante: Jogu AFF Cup U-23, Timor-Leste manán Brunei 3-1
Minutu primeiru hahú ekipa rua lansa kedan kontra no atake ba malu tuir tekniku no abilidade ida-idak nian ho ambisaun ne’ebé makas hakarak hatama lais golu nune’e bele fó vitoria ba ida-idak nia nasaun, maibé, forte ba ekipa rua lao hanesan nune’e laiha golu ruma mak akontese iha minutu primeira parte.
Dolar ba segunda parte ekipa rua nafatin hatudu jogu ho sériu, Timor -Leste ladun domina bola tanba ekipa Vietnam halo presaun makaas. Maibé esforsu hirak Vietname halo hela de’it hanesan esforsu tanba la marka golu ruma, hanesan mós Timor-Leste.
Nune’e to’o minutu segunda parte termina laiha tan golu ruma mak akontese ba ekipa rua nune’e hela ho empate eskore 0-0.
Haree ba ne’e komisaun liu hosi árbitru aumenta tan tempu adisionál minutu 30, maibé rezultadu nafatin 0-0 no hakat ba suta penalidade (penalti)
Hosi tiru penalidade ne’e Timor -Leste falla tanba jogadór Jhon Frith (6) la konsege tiru tama no fó oportunidade ba Vietname tama ba finál ho rezultadu 5-3.
Derrota iha penalidade ne’e, Timor -Leste labele hakat ona ba oin ho nune’e Vietname mak sei ba hasoru Thailandia iha finál ne’ebé akontese loron 27 fevereiru ne’e.
FFTL orgullu
Maski nune’e, Sektretáriu Jerál Interinu Federasaun Futeból Timor -Leste (FFTL), Frederico Martins, sente orgullu ba luta ne’ebé jogadór sira halo ona maske derrota no la to’o finál jogu AFF.
“Laiha liafuan, so orgullu ho jogadór sira nia esforsu no luta. Timor-Leste ba oin nasaun seluk sei la haree ho matan sorin tan,” Frederico hateten ba Agência TATOLI via rede Whatsap hafoin jogu hotu.
Notísia relevante: Manán Kamboja 1-0, FFTL louva jogadór no treinadór Timor Leste
Jornalista: Hortencio Sanchez
Editór : Florencio Miranda Ximenes
