DILI, 25 fevereiru 2022 (TATOLI)–Dirijente Eskola Ensinu Sekundáriu Jerál Tékniku Vokasionál (ESTV) Hera foti desizaun suspende atividade aprendizajen estudante 175, kompostu hosi feto 82 no mane 93 tanba eskola tama iha kondisaun risku dezastre naturál.
Tuir Adjuntu Diretór Eskola ESTV Hera, Anselmo Freitas, parte eskola halo ona enkontru ho Diretór Nasionál Ensinu Sekundáriu Jerál Tékniku Vokasionál hosi Ministériu Edukasaun Juventude no Desportu (MEJD) atu hetan desizaun ruma ba atividade eskola nian, tanba inundasaun ne’ebé akontese iha segunda (21/02) konsege sobu sala aula ida ho hariis fatin eskola.
“Halo ona enkontru maibé seidauk iha desizaun ida. Tanba ne’e ami rasik deside suspende provizóriu atividade ensinu aprendizajen ba estudante sira hodi hein desizaun tuir mai hosi Ministériu Edukasaun Juventude no Desportu,” Adjuntu Diretór Eskola relata ba Agência TATOLI, iha resintu eskola, sesta ne’e.
Notísia relevante: Udan-boot rezulta mota kuaze sobu sala Eskola Tékniku Vokasionál Hera
Nia informa, daudaun estudante sira la eskola, tanba hein hela MEJD ninia intervensaun hodi responde ezijénsia eskola.
“Ami-nia sala la sufisiente ona atu hala’o prosesu aprendizajen normál. Ami hato’o ona ba Diretór Nasionál Ensinu Tékniku Vokasionál katak sei bele estabelese filafali medida, maibé nia hateten sei hato’o lai ba Ministru, desizaun oinsá maka nia sei informa fali ba ami,” nia tenik.
Ba kestaun ne’e, Jornalista Agência TATOLI tenta konfirma asuntu ne’e ho Diretór Nasionál Ensinu Sekundáriu Tékniku Vokasionál kona-ba ezijénsia eskola ne’e maibé la konsege tanba okupadu.
Totál estudante ESTV Hera hamutuk 175, kompostu hosi departamentu komérsiu 10o ano iha 26, 11o ano iha 18 no 12 o ano iha 23, ba kursu akontablidade iha 39, 11o iha 37 no 12o ano iha 32.
Jornalista : Tomé Amado
Editora : Julia Chatarina
