iklan

HEADLINE, SEGURANSA

Dezloka ba munisípiu, Komandu PNTL husu membru hatudu disiplina no neutru

Dezloka ba munisípiu, Komandu PNTL husu membru hatudu disiplina no neutru

Komandu Jerál Polisia Nasionál Timor-Leste (PNTL), segunda (28/02) hala’o serimónia dezlokasaun ba membru-sira hodi fó apoia seguransa ba atividade kampaña no Eleisaun Prezidensiál 2022 iha territóriu Timor laran tomak. Imajen/ media PNTL

DILI, 28 fevereiru 2022 (TATOLI)- Komandu Jerál Polisia Nasionál Timor-Leste (PNTL), segunda (28/02) hala’o serimónia dezlokasaun ba membru-sira hodi fó apoia seguransa ba atividade kampaña no Eleisaun Prezidensiál 2022 iha territóriu Timor laran.

Sermónia dezlokasaun ne’e dirije direta hosi hosi segundu Komandante Jerál PNTL, Komisáriu Mateus Fernandes, iha edifísiu Unidade Espesiál Polísia (UEP), Bairru-Pité, Dili.

“Filozofia PNTL nian ba iha eleisaun nian, maka neutru no imparsiál no disiplina. Tanba disiplina mak sai nehan ba ita, husu ba Komandu  PNTL 13 no Rejiaun Adminitrativu Espesiál Oé-Cusse no Ambeno no Komandante Unidade sira tenke halo tuir ida ne’e, nune’e bele fó susesu ba ita nian eventu kampaña no eleisaun ,” Segundu Komandante Jerál  PNTL, Komisáriu Mateus Fernandes, fó hanoin.

Notísia relevante: PNTL halo simulasaun kombate asaun krime iha kampaña no eleisaun

Membru PNTL halo formatura ikus, molok dezloka ba munisipiu sira asegura kampana no eleisaun prezidensial. Imajen/media PNTL

Membru sira sei koloka tuir orientaaun hosi Komandante munisípiu atu bele asegura seguransa ba kampaña no eleisaun prezidesiál.

Nune’e, Komisáriu Mateus Fernandes husu atu membru tomak ne’ebé hala’o knar ida ne’e atu ho resposabilidade másimu tuir misaun ne’ebé PNTL iha.

“Politika Komandu ninian ba asegura kampaña no eleisaun tanba ita hotu  hakarak hetan rezultadu eleisaun ida ne’ebe kredivel, eleisaun ida ne’ebe di’ak. Ita nian rai ne’e  hakarak para ita atu  hametin demokratisaun, aselera dezenvolvimentu iha ita nian rain, tan ne’e husu ba membru sira atu kumpre orientasaun ne’ebé fó ona,” Komisáriu fó hanoin.

Husu atu membru ne’ebé mak dezloka atu halo koordenasaun ho autoridade lokál iha munisípiu, parte Komisaun Nasionál Eleisaun (CNE,sigla portugés), parte Sekretáriadu Tékniku Administrasaun Eleitorál (STAE) no sira ne’ebé iha resposbailidade kona-ba kampaña no eleisaun atubele halao servisu ho di’ak.

Nune’e, Komandu PNTL alerta ba públiku katak kuandu ema ruma koko halo asaun krime ruma iha kampaña no eleisaun, seguransa ira porntu hatán ka la fó toleránsia ba hahalok krime.

Iha biban hanesan, Komandante Operasaun Nasionál iha Komandu Jerál PNTL, Superintendente Xefe Pedro Belo, informa, formatura jerál ne’e nuudar preparasaun ikus PNTL nian  hodi dezloka ba munisípiu atu fó seguransa ba kampaña no eleisaun.

“PNTL mós prepradu nafatin hodi asegura ba fatin balun ne’ebé maka sei iha deskonfia katak iha ameasa ka ou iha tensaun polítika, nune’e PNTL sei asegura nafatin fatin sira ne’e, atubele ita nian sidadaun sira bele moris iha ambiente ne’ebé  hakmatek nia laran,” nia afirma.

Membru PNTL ne’ebé atu dezloka ba munisípiu hotu hamutuk 4.000-resin, kompostu Komandante Unidade Espesial Polisia (UEP), Batalllaun Orden Publiku (BOP), Komandu Espesial (COE), Korpu Seguransa Pessoál (CSP), Unidade Patrollamentu Fronteira (UPF), Unidadade Polísia Marítima (UPM), inklui membru balun hosi Kuartél Jerál PNTL nian hodi aumenta ba membru sira iha 12 munisípiu no RAEOA.

Notísia relevante: PNTL distribui viatura ba komandu munisípiu asegura kampaña-eleisaun

Jornalista: Natalino Costa

Editór      : Florencio Miranda Ximenes

iklan
iklan

Leave a Reply

iklan
error: Content is protected !!