Kondisaun estrada difikulta ezekusaun UKL faze dahuluk iha RAEOA

OÉ-CUSSE, 28 fevereiru 2022 (TATOLI) – Kondisaun estrada difikulta ezekusaun projetu Uma Kbiit Laek faze dahuluk iha Rejiaun Administrativa Espesiál Oé-Cusse Ambeno (RAEOA).

Diretór Planu Nasionál Dezenvolvimentu Suku (PNDS) iha RAEOA, Sebastião Tanesi, informa, ezekusaun ba projetu UKL faze dahuluk iha Oé-Cusse tarde liu, tanba Oé-Cusse hetan projetu hamutuk 36, maibé daudaun ne’e unidade rua mak konklui ona, hela unidade 34 mak progresu la’o hela, ho nia progresu fízku atinje 52.03%.

“Tuir loloos ita remata ona unidade 34 ne’e, maibé serbisu tarde uitoan, tanba impaktu udan kondisaun estrada mós ladi’ak, difikulta transporte sira atu transporta materiál ba iha foho, liuliu sub-rejiaun Oésilo, Pásabe no Nítibe, susar tebes, maibé bainhira udan-been menus fornesedór sira sei kontinua tanba tuir ita-nia planu obra hirak-ne’e sei finaliza iha inísiu abríl. Ida-ne’e ha’u garantia tanba materiál preparadu ona,” Sebastião Tanesi, informa ba Agência Tatoli, iha Palaban, Oé-Cusse, segunda ne’e.

Nia fó-sai katak, hosi unidade 36 ne’e, unidade rua finaliza ona iha aldeia Noe-Ninen, suku Cunha, sub-rejiaun Pante Makasar, no daudaun ne’e benefisiáriu mós hela ona uma uma foun ne’e, nune’e ba 52,03% ne’e iha parte tasi-ibun konstrusaun balu taka ona kakuluk, sinta-leten kompleta ona, hela de’it taka kalen, ne’ebé ba serbisu fíziku seluk kuaze hotu ona.

Purtantu medida ba konstrusaun Uma Kbiit Laek iha RAEOA la hanesan, balun nia orsamentu rihun $14, ho totál orsamentu ne’ebé Guvernu sentrál liuhosi Ministériu Administrasaun Estatál (MAE) aloka mai iha RAEOA ba projetu 36 ne’e hamutuk $611,296.00.

Entretantu, iha tinan fiskál 2021 Governu harii Uma Kbiit Laek hamutuk unidade 1.254 iha suku 424 iha munisípiu 12 no RAEOA, ho montante orsamentu hamutuk $25,000.000 kustu ba kada uma purvolta $14,000 to’o $17,000.

Nune’e projetu Uma Kbiit Laek, ne’ebé konstrui iha modelu rua, dahuluk modelu 48 m², inklui kuartu tolu (3), sala vízita ida (1) no dapur ida (1), daruak modelu 37 m² inklui kuartu rua (2), sala vízita ida (1) no dapur ida (1).

Jornalista   : Abílio Elo Nini
Edtór          : Evaristo Soares Martins