DILI, 03 marsu 2022 (TATOLI)— Sekretáriu Jerál Asosiasaun Futsál Timor-Leste (AFTL), Fernando Baptista Xavier, informa selesaun nasionál futsál hosi AFTL hahú preparadu tékniku no fíziku atu ba kompete iha ASEAN Football Federation (AFF) Futsal Championship 2022, ne’ebé hala’o iha abríl ne’e, iha Tailándia.
“Ita tama iha grupu B ne’ebé hamutuk ho Vietame, Myanmar no Austrália, hatudu ekipa Timor-Leste hasoru loos nasaun ne’ebé todan, maibé ita preparadu ona atu ba hasoru no kompete iha jogu ne’e,” Sekjer Fernando, hateten ba Agência TATOLI via rede sosiál, kinta ne’e.
Daudaun ne’e, jogadór selesaun nasionál futsal na’in-20, maibé iha tempu besik sei halo selesaun hodi hili de’it na’in-16 mak sei ba partisipa iha jogu ne’e.
Tuir planu jogadór sira sei aranka ba Thailandia iha tempu besik tanba Cpoa AFF Futsál 2022 realiza iha Tailándia iha loron 2 to’o 10 abríl, iha Huamark Indoor Stadium, Bangkok.
Ekipa rua ne’ebé sai mellor klasifikasaun iha kada grupu mak sei avansa ba semifinál Copa AFF futsal 2022.
Nune’e, ekipa tolu ne’ebe sai mellor klasifikasaun sertamente avansa ba Copa Asiátika Fustál 2022, iha loron 25 setembru to’o 25 outubru, iha Kuwait.
AFF ofisialmente dada sorteiu (drawing) grup sira iha Copa AFF Futsál 22, iha segunda (21/2/2022).
Rezultadu sorteiu divisaun grupu ba Copa AFF Futsál 2022, hanesan grupu A kompostu hosi nasaun Tailándia,Malazia, Indonézia, Kamboja no Brunei Darussalam.
Enkuantu grupu B, kompostu hosi nasaun Vietnam, Myanmar, Timor-Leste no Austrália.
Jornalista: Hortencio Sanchez
Editór : Florencio Miranda Ximenes
