PM Taur manifesta solidaridade ba povu Ukráina
DILI, 03 marsu 2022 (TATOLI)— Primeiru Ministru, Taur Matan Ruak, hateten lori povu Timor-Leste nia naran, manifesta solidaridade ba povu Ukraina, ne’ebe enfrenta hela situsaun funu tanba invasaun ilegál hosi nasaun Rúsia.
“Ha’u hakarak manifesta solidaridade ba povu Ukraina ne’ebe Rúsia invande. Timor-Leste hanesan nasaun ida ne’ebé iha esperénsia okupasaun no invasaun. Tanba ne’e, Timor-Leste nia posizaun kontra kualkér tipu okupasaun tanba lori sofrimentu ba ema liuliu ba feto, labarik sira, ferik no katuas sira,” PM Taur hateten iha nia intervensaun sai oradór ho tema a importancia do dia nacional veterano dala-lima iha Kuartél Jenerál F-FDTL Fatuhada, kinta ne’e.
Nune’e, PM Taur husu ba líder mundiál hala’o diálogu hodi buka solusaun pasífika hodi rezolve konflitu entre Rúsia no Ukráina atu labele sakrifika povu barak mate.
‘Ita manifesta ita nian solidaridade, ita apela ba mundu, para que buka solusaun pasifika ba konflitu ida ne’e hodi ema evita mate. Tanba ema nia vida la faan no la sosa iha merkadu, ema hotu iha direitu ba moris,” Xefe Governu ne’e akresenta.
Antes ne’e, Pessoa Eminente g7+, Kay Rala Xanana Gusmão mós halo ona karta hodi husu ba líder mundiál promove diálogu hodi hapara funu entre Rúsia no Ukráina.
Nasaun Frájil, iha konflitu no pos-konflitu sira ne’ebé hamahon an iha g7+, lamenta tebes ho akontesimentu iha Ukránia.
“Ami akompaña hela dezenvolvimentu husi akontesimentu trájiku ida ne’e. Ami haree katak komunidade internasional ho líderes mundial sira, em vez de halo esforsu atu promove diálogu konstrutivu, sira hatudu preparativus militares ba funu,” refere karta ne’e.
Karta hosi pesosa eminente g7+ ne’e hatutan: “Ami kondena invazaun Russia ba Ukrania. Invazaun ida ne’e fó hanoin hikas fali mai ita kona-bá invazaun iha Afganistaun iha 2001 no iha Iraque 2003.
g7+ observa katak nasaun Osidentál sira faan kilat ba nasaun sub-dezenvolvidu nia laran ne’ebé rezulta ba labarik inosente sira mate iha fatin sira hanesan Yemen no fatin sira seluk.
“Ami sempre deklara katak milliaun refujiadu sira iha Europa ne’e rezultadu husi konflitu ne’ebé promovidu husi nasaun Osidente ba nasaun sub-dezenvolvidu,” deklara karta ne’e.
Depois hetan estatutu observador permanente iha Nasaun Unida, ami suporta Sekretáiu Jerál ONU nia apelu hodi imediatamente halo cesar do fogu (Ceasefire) iha Ukrania.
Ba nasaun 20 ne’ebé frajil no afetadu husi konflitu no pos-konflitu, husi g7+, ami haree ho triste boot, maibé ho esperansa katak lídere mundiál sira bele foti lisaun ida ne’e hodi bele muda sira nia polítika kona-ba nasaun sub-dezenvolvidu.
“Ami apela ba diágu abertu no konstrutivu hodi hakotu sofrimentu ne’ebé povu Ukrania hetan. Líder mundiál tenke tau ses sira nia interesse estratéjiku no hegemónico no fó oportunidade ba Pás no hasa’e interese povu sira ne’ebé mak sofre hela.
Nune’e, g7+ hakarak sai lian ba ema sira ne’ebé lian laek. Tanba ne’e mak ami halo deklarasaun ida ne’e ho konfiansa boot katak ami-nia lian sira sei rona.
Notísia relevante: Xanana husu líder mundiál promove diálogu hapara “funu” entre Rúsia no Ukránia
Jornalista: Natalino Costa
Editór : Florencio Miranda Ximenes
